Гаязовлар нәселе җиңү яулады

Гаязовлар алар гасырларны-гасырларга тоташтырган уңган-булган, хезмәт һәм сәнгать сөючән буын. Сәхнә түрендә бөек ана — быел туксан яшен тутыручы Мөнирә апаның урын алуы гына да ни тора! Әлеге фестиваль гаять тә зур, мәгънәле чара ул, елдан-ел камилләшә, ямьләнә бара. Алты ел уздырылу дәверендә эчтәлеге дә баеды, мөһимлеге дә артты. Тарих, мәдәният-сәнгать һәм башка өлкәләрдә эшләүче белгечләрдән гыйбарәт жюри да объективлыгы белән ел да сокландыра килә. Ә биредәге күргәзмәләрне күрсәгез икән... шул исәптән Гаязовлар нәселе күргәзмәсендә борынгы әби-бабаларының нинди савытларда ничек итеп икмәк пешерүләреннән башлап, бүгенге көн вакыйгаларына бәйләп, махсус хәрби операциядәге кияүләре Фидәел Хәсәновның Ватан алдындагы бурычын намус белән үтәве дә чагылыш тапты. Тарих кабатланды, бүгенге көн Гаязовларны янәдән бергә җыеп, сәхнәгә менгезде. Янәдән сәхнәдә чабата биюе гөрләде. Бииләр, олысы да, кечесе дә бии. Әтиләре Гарәфетдин абый белән сиксәненче елларда тальян гармунда уйнап, чабата биюләре белән Рәсәйне яулаган, хәтта Төркиягә кадәр барган, телевидение экраннарыннан төшмәгән нәсел бит алар.

— Бу юлы аларны туган авылы Чапшар тарихын өйрәнүче, нәсел шәҗәрәләрен эзләп-барлап, җыеп баручы, гарәп хәрефләренә төшенгән, метрикәне укый белгән, унөч буын нәсел шәҗәрәсен төзегән Шәүкәт әфәнде туплады, зур җиңүләргә рухландырды. Әлеге гаиләнең буын ачкычы — бүген Шәүкәт әфәнде кулында дисәк тә хак булыр.

— 2019 елдан башлап Татарстан Республикасының Архив эше буенча Дәүләт комитеты тарафыннан «Эхо веков в истории семьи — Тарихта без эзлебез» дигән гаилә фестивале үткәрелеп килә, — ди район архивы җитәкчесе Рүзилә Ильясова. — Конкурс муниципаль, зона һәм республика этапларында уза. Фестивальдә берничә буын вәкилләреннән берләштерелгән гаилә-туганлык төркеме нинди милләттән, диннән булуына карамастан, яшәү урынына бәйсез рәвештә катнаша ала. Балтач районында бәйге 27 февраль көнне район мәдәният үзәгендә үтте. Чарада Чапшардан — Гаязовлар, Нөнәгәрдән — Тляковлар, Соснадан Закировлар гаиләләре катнашты. Район этабында Гаязовлар җиңү яулап, аларга район данын зона этабында яклау бурычы куелды. Һәм менә 9 апрель көнне Арча районында, респуб-лика бәйгесенең зона этабында Әтнә, Арча, Кукмара, Саба, Теләче, Питрәч, Мамадыш, Биектау һәм Балтач районнары арасында барган бәйгедә Чапшар авылында яшәүче Гаязовлар беренче урын яулады. Бу гаиләнең «алтын баганасы» — Шәүкәт әфәнде конкурсны игълан итүгә үк архив бүлеге белән элемтәгә кереп, ихластан якын килеп бәйгегә әзерләнә башлады. Зур, матур гаилә бердәм булып тупланып, бик күп буыннарны эченә алган шәҗәрәне тагын да тулыландырды. Күп төрле яраткан милли ризыкларын бергәләшеп пешереп, искиткеч күргәзмә тәкъдим итте. Бердәм, иҗади, тирән гыйлемле бу күркәм гаиләгә сәхнәдә дә тиңнәр булмады. Ата-бабаларыбыздан килгән гореф-гадәтләребезне дәвам итеп яшәүче үрнәк гаиләне чын күңелдән котлыйм. Шушы конкурска катнашып, куйган зур хезмәтләренә сокланып, олы рәхмәтемне җиткерәм.

Татарстаныбызның Архив эше буенча дәүләт комитеты төп хезмәтләреннән тыш нинди күләмле, мәртәбәле, файдалы эш башкара, җиңүчене һәм призлы урын алучыларны зур суммада акчалата бүләкли дә әле. Шушындый күркәм бәйге уздырып нәсел-нәсәбәне берләштергән, туганнарны тагын да якынайткан дәүләт архивына, аның җитәкчесенә, хезмәткәрләренә һәм дә инде бал кортыдай тырыш Гаязовларга, моңарчы да катнашып Татарстан тарихында эз калдырган райондашларыбызга катнашканнары һәм дә яхшы хәзерлекләре өчен рәхмәттән башка сүз юк.

Фестивальдә Арча районы башлыгы Илшат Нуриев катнашып, ихлас теләкләрен җиткерде. Тормыш матурлыгына, хезмәт батырлыгына, дуслык-татулыкка этәргән мондый чаралар дәвамлы булсын иде.