Хөрмәтләделәр

28нче сентябрь көнне бистәбезнең Знче номерлы «Карлыгач» балалар бакчасында Өлкәннәр көнен билгеләп үттеләр. Балалар чыгышын тамаша кылганнан соң, бәйрәм мул табын артында дәвам итте. Изге теләкләр, җылы сүзләр, бүләкләргә өлкәннәр ихластан куанды.

Алан мәктәбендә Өлкәннәр бәйрәме Балтач үзәк мәчете имамы Рамил Бикбаев катнашында үтте. Биредә өлкәннәр өчен көзге ярминкә оештырылды, бәйрәм уңаеннан язылган иншалар конкурсына нәтиҗә ясалды. Рамил хәзрәт вәгазьләре исә бәйрәмгә тагын да ямь өстәде. Өлкәннәр хөрмәтенә мәктәп коллективы мул табын әзерләгән иде. Бөрбаш җәмгыяте исә күчтәнәч-пакетлар белән сөендерде.