Корбан гаете мөбарәк булсын!
Хөрмәтле райондашлар, газиз дин кардәшләребез! Сезне ихлас күңелдән ислам динендәге олуг бәйрәмнәребезнең берсе булган Корбан гаете белән тәбрик итәм.
Корбан гаете ислам дине тарихында үзенчәлекле һәм изге көн булып санала. Мөселман кардәшләребезнең күпчелеге бу көнне элеккеге гореф-гадәт йолаларга тугры калып корбан чала, шул иттән ятимнәргә, мохтаҗларга өлеш чыгарып изгелек кыла, табын корып, корбан ашлары уздыра. Дин бит ул үгет-нәсихәт бирү, тәрбиягә өйрәтү чарасы да. Бу изге көндә мөселманнар акланып-пакьләнеп иртәнге гает намазларына җыела, мәчетләребездә бар җиһанга иман нуры таратып моңлы азан тавышлары яңгырый. Бирегә килгәннәр Аллаһы Тәгаләгә табынып рәхмәтен әйтә, дога кыла, вәгазьләр тыңлый.
Ислам дине безнең яшәешебезне, телебезне, иманыбызны гына саклап калмады, ә мәдәниятебез, сәнгатебез, әдәбиятыбыз үсүгә дә зур өлешен кертте. Мәктәп-мәдрәсәләрдә ислам нигезләре, әхлак дәресләре өйрәтелә икән, димәк әхлакый нигезебез ныгый, намусыбыз сафлана, рухи байлыгыбыз арта дигән сүз. Бу өлкәдә фидакарь хезмәт башкаручы дин әһелләренә кешеләргә туры юлны күрсәтүдә Аллаһ сабырлык һәм сәламәтлек бирсен. Корбан гаете һәр йортка, һәр гаиләгә бәхет-шатлык, бәрәкәтлек һәм иминлек иңдерсә иде. Ходай җан тынычлыгыннан, тән сихәтлегеннән аермасын. Изге сәгатьләрдә изге ниятләргә багышлап чалган корбаннарыгыз кабул булсын. Изге бәйрәмебез мөбарәк булсын!
Олы ихтирам белән Балтач муниципаль районы башлыгы МАРАТ ЗАРИПОВ
Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.
Иң мөһим һәм кызыклы язмаларны Татмедиа Telegram-каналында укыгыз
