«Кыл ке ӧз луы, лулчеберет но быроз»

Пусйыны кулэ: та бадӟым ужрад радъяськиз Россиысь калыкъёслэсь лулчеберет мерассэс утён арез пусъён улсын. Пумиськон Удмуртиысь Йӧскалык политикая министерстволэн, Татарстанысь Дышетонъя но наукая министерстволэн, Лулчеберетъя министерстволэн, Татарстанысь но Удмуртиысь Калыкъёслэн эшъяськон юртъёссылэн, Татарстанысь удмуртъёслэн огазеяськонзылэн но Балтасьысь исполнительной комитетлэн тыршемзылы луыса радъяськиз.

Ужрадэ пыриськизы Балтась, Кукмор, Мамадыш, Менделеевск, Саба, Агрыз, Бавлы ёросъёсысь дышетскисьёс но дышетӥсьёс, культурая юртъёсын тыршисьёс, куд-ог ёросъёсысь удмуртъёслэн кивалтӥсьёссы но Удмурт Элькунысь этнокультурной но йӧскалык ужпумъёсъя ӧнерчиос.

Дано куноос пӧлын вал Удмуртиысь йӧскалык политикая министр Эдуард Петров, Татарстан Республикаысь Кун Кенешысь дышетонъя, лулчеберетъя, наукая но йӧскалык ужпумъёсъя комитетлэн председателезлэн воштӥсез Татьяна Рыбакова, Татарстан Республикаысь дышетонъя но наукая министрлэн воштӥсез Минзалия Закирова, Татарстанысь удмуртъёслэн НКА-зылэн тӧроез Андрей Герасимов, Вань удмуртъёслэн «Удмурт Кенеш» огазеяськонзылэн исполкомезлэн членэз, Удмуртиысь Йӧскалык политикая министерствоысь йӧскалыккуспо (межнациональной) кусыпъёсъя ёзэтлэн кивалтӥсез Александр Корепанов, Удмуртиысь Кам сьӧр удмуртъёслэн огазеяськонэнызы кивалтӥсь Флюра Чибышева, Татарстан Республикаысь Президентлэн Департаментэзлэн йӧскалык политикая управлениысьтыз внутренней политикая валтӥсь кенешчи Марина Иванова.

Пленарной заседаниын лыктэм куноосты пумитаз но ӟечкылаз Балтась ёросысь исполнительной комитетлэн кивалтӥсез Айдар Хайрутдинов. Со ёросамы калыкъёслэсь кылъёссэс но лулчеберетсэс утён но азинтон ӧрын нуиськем уж сярысь вераз.

Пленарной пукетлэн ужаз пыриськем Татарстанысь Кун Кенешысь дышетонъя, культурая, наукая но йӧскалык политикая комитетлэн кивалтӥсезлэн воштӥсез Людмила Рыбакова но кыллэн но лулчеберетлэн юн герӟетсы, соосты утёнлэн кулэлыкез сярысь кылпум поттӥз.

— Кыл — лулчеберет мераслэн инъетэз. Кыл ке ӧз луы, лулчеберет но быроз. Анай йӧлэн пыӵам кыл выжыысен выжые кӧчыны кулэ. <…> Семьяысен гинэ со (кыл — О.П.) калыке потыны быгатэ. <…> Китай калыклэн вань сыӵе тодмо веранэз: мед сяськаяськозы вань сяськаос. Соку гинэ асьме дуннемы чебер но пӧртэмлыко луоз. Малы ке шуоно калыкъёс — со со ик сяськаос, кудъёсыз асьме республикамылэсь йӧспӧртэм сяська керттэтсэ кылдыто, — шуиз со.

Удмурт Элькунысь йӧскалыкъёсын ужан политикая министр Эдуард Петров но вань люкаськем калыкез ӟечкылаз, Татарстан но Балтась ёрос кивалтэтлы тау каремзэ вераз, интыысь калыклэсь удмурт кылэз но лулчеберетэз утьыны тыршемзэ пусйиз. Пленарной заседаниын ик Эдуард Степанович Татарстанысь удмурт автономилэсь активистъёссэ Таукарон гожтэтъёсын пусйиз. Удмурт Элькунэн ӟеч кусыпъёсты юнматон понна Татарстан Элькунын улӥсь удмурт калыклэсь лулчеберетсэ, кылзэ но сям-йылолъёссэ азинтон удысын бадӟым уж нуэмзы понна тау каремын вал Ӟаны шоръёзо школалэн директорезлы Константин Граховлы, Кукмор ёросысь Лельвиж школаысь удмурт кылъя но литературая дышетӥсьлы Людмила Андреевалы, Балтась ёросысь исполнительной комитетлэн кивалтӥсезлэн воштӥсезлы Ильгам Гайнутдиновлы но «БиГерд» огазеяськонлы.

Удмурт кыллы но лулчеберетлы сӥзем ужрад азинтӥськиз нылпиос пӧлын ортчытэм пӧртэм мастер-классъёсын но «Шунды» огазеяськонысь егитъёсын радъям «Шудком» йыртӥян шудонэн.

Со дыре бадӟымъёс ужазы нимысьтыз радъям секциосын. Ужрадын куинь секция ужаз. Удмурт кылэз но литератураез дышетон, дышетӥсьёслы тодон-валанзэс будэтонъя курсъёс, палэнын улӥсь удмуртъёслэсь сям-йылолъёссэс утён но азинтон, пӧртэм удмурт проектъёсын тодматскон но опытэн вошъяськон. Та но мукет юанъёсты эскеризы секциослэн ужаз пыриськемъёс.

Трос лэчыт ужпумъёс ӝутэмын вал. Шумпотымон, одӥгез сюлмаськытӥсь юан — школаосын удмурт кылын учебникъёслы кулэяськон — туннэ нуналэ сэрттэмын-пертчемын шуыны луэ. Удмуртиысь йӧскалык политикая министерство та ужез ас бурд улаз басьтыны оскытӥз. Табере Удмуртия ачиз келялоз палэнын улӥсь удмуртъёс доры кулэ луись школа учебникъёсты.

Асьме ёросысь удмурт кылъя но литературая дышетӥсьёс та дырозь пӧртэм мугъёсын сэрен электрон учебникъёсын ужаны ӧз быгатэ. Нош, кылсярысь, Кукмор ёросысь Ошторма-Юмъя школаын таӵе учебникъёсын ини кӧня ке ар мыло-кыдо ужало вылэм. Та учебникъёслэн пайдалыксы сярысь вераз школалэн директорез Виталий Семёнов. «Электрон учебник ваньмызлы юрттэ, пиналъёсты но», — шуиз Виталий Геннадьевич. Солэн верамезъя, нылпиос асьсэос ик быгато, пе, тренажёрной тестъёсын ужаны. «Мылкыд карисьёслы олимпиадае дасяськыны но со туж умой материал», — шуиз со.

Эшшо одӥгез сюлмаськытӥсь ужпум Татарстанысь удмурт кылъя но литературая дышетӥсьёслэн тодон-валанзэс будэтон вылысь Удмуртиын радъяськись курсъёсы пыриськыны мылкыд каременызы герӟаське. Оскыны кыле, таиз ужпум но матысь дыре умоен быдэстӥськоз шуыса.

Огъя вераса, туж пайдаё но тунсыко ужрад вал та — удмурт кыллы но лулчеберетлы сӥзем нунал. Малпасько, котькуд пыриськем мурт аслыз кулэ информация шедьтӥз но опыт басьтӥз шуыса.

Йылпумъяськиз удмурт кыллы но лучеберетлы сӥзем нуналъёс улсын ортчем ужрад «Шудком» шудонэ пыриськем пиналъёсты кузьымъёсын пусъёнэн но эктонъя «Чебеляй» студиен, Балтась ёросысь фольклор коллективъёсын радъям концертэн.