Парходада авылдашлар очрашуы узды (+фото)

Җирлекләрдә Сабантуйлар белән беррәттән авыл көннәре, очрашулар үтә. Шундый авылдашлар очрашуының  берсе Пархода авылында да үтте.

Пархода  гаҗәеп матур табигатьле, салкын чишмәле, тау башына урнашкан авыл. Тукай шигырендәге кебек: “Тау башына салынгандыр безнең авыл, бер чишмә бар, якын безнең авылга ул;”...дип әйтәсе килә.

Тик ни кызганыч, бүгенге көндә биредә бушлык. 1987нче елның ноябрь аенда соңгы гаилә бу авылдан Пыжмарага күченә.

Пыжмара авылында яшәүче күп кенә гаиләләрнең тамырлары, төп нигезләре Парходага барып тоташа. Шуңадырмы, Пыжмара халкы Парходаны үз итә, кеше яшәмәсә дә, бер генә йорт та булмаса да, ул авылга юлны суытмыйлар. Һәр җәй саен, шушында туып-үскән, тормыш җилләре белән төрле якларга сибелгән авылдашлар бер-берсен күрергә зарыгып кайталар.

Быелгы очрашу да бик күңелле үтте. Парходалылар күңелле бәйрәм ясаган, очрашу мәшәкатьләре белән янып йөргән Тәбрик Рәхмәтуллинга, Хәлим Әүхәтшинга бик рәхмәтле.