Россия Президенты Владимир Путин Балтач районында яшәүче Мөхәрләмовлар гаиләсен “Ата-ана даны” ордены белән бүләкләү турында указга кул куйган.
Алсу һәм Хәбир Мөхәрләмовларның бер гаилә булып яши башлауларына 35 ел тулган. Алар 15 бала тәрбияләп үстергән. Өлкән улларына – 34, төпчек кызларына – 10 яшь. Гаилә башлыгы Балтач районы “Кама” хуҗалыгында 38 елдан артыграк вакыт дәвамында тракторчы булып эшли. 2019 елда үзенә “Татарстан Республикасы атказанган авыл хуҗалыгы механизаторы” дигән мактаулы исем бирелгән. Алсу ханым – хәзер инде пенсиядә. Өлкән уллары – Хәлил бизнес белән шөгыльләнә, Шамил – юлчы, Рамил һәм Альберт – төзүчеләр, Асаф – янгын сүндерүче, Инсаф – тракторчы, кызлары Айсылу балалар үстерә, Гөлүсә – шәфкать туташы. Уртанчы балалары – Ранил, Данил һәм Гөлинә – студентлар, Гөлчәчәк, Алия, Илүсә һәм Зөһрә мәктәптә укый.
“Ата-ана даны” ордены 2008 елның 13 маенда гамәлгә куелган. Орден белән җиде һәм аннан күбрәк балалар тәрбияләп үстергән (уллыкка (кызлыкка) алган) ата-аналар бүләкләнә. Бүләккә лаек дип табылган һәр гаиләгә бер тапкыр 100 мең сум акча бирелә.
Ватаным Татарстан
Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.
Иң мөһим һәм кызыклы язмаларны Татмедиа Telegram-каналында укыгыз
