"Маяк"та элиталы сортлар белән эшлиләр

Агроном вазифасын башкаручы Тәбрис абый чәчүлек җирләре, тупланган ашлама, язгы чәчүгә планлаштырган эшләр турында яттан сөйләгәндәй сөйләп чыкты. Моңа аптырарлык та түгел, хәзерге заман агрономы һәр яктан да уңган булырга тиеш. Чөнки бу һөнәр - авыл хуҗалыгының тоткасы булып тора. Хуҗалыкта яхшы агроном булу эшнең уңышлы куелышын, хуҗалыкның үсүен һәм алга баруын күрсәтә торган билге.

«Маяк»ның 4034 гектар чәчүлек җире бар. Шуның 760ы, ягъни 280 гектар көзге бодай белән 480 гектар арыш көздән чәчелде. 1070 гектарда күпьеллык үлән җирләребез бар, терлекчелек юнәлешенә басым ясап эшләгәнгә күрә әлеге җирләрнең күләмен арттырдык. Яз чәчеләсе мәйданнарның 400ен кукуруз алып тора. Аның 150 гектарын сугып алырга планлаштырабыз. Шулай ук 150 гектарда рапс чәчәчәкбез. Узган ел ул 100 генә иде, 2016 елның уңышын мулдан җыеп алып, әйбәт бәядән сата алгач, быел тагын 50 гектарга арттырдык. Шулай ук 110 гектарда бодай, борчак, солы, арпа чәчәргә исәплибез. Азык культуралары исә 600 гектарда игеләчәк. Терлекчелек өчен 450 гектарда күпьеллык үләннәр - люцерна, клевер каралган, - диде җәмгыятьнең баш агрономы.

Биредәге симәнә элита һәм супер элита сортларыннан гына. Быел аларның «Йолдыз» сортлы язгы бодаен Тимирязев исемендәге җәмгыятьтән, ә «Таң» сортлы борчакны «Татарстан»нан алганнар, ә «Кировский местный» сортлы клевер Киров өлкәсеннән кайтартылган. Яз көне гадәттәгечә орлыкларны җылыту эше башкарыла. Биредә дә арпа белән солы әлеге этапны узган инде. Ашлама тупланышы да әйбәт: 325 тонна - катлаулы, 90 тонна азотлы ашлама һәм 180 тонна селитра әзерләнгән, дөрес, бу әле җитәрлек үк түгел, ләкин кыр эшләре башланганчы һичшиксез әзерләп бетерәселәренә ышаныч зур. Чөнки иртә килә дигән яз да иртә килергә ашыкмады, шуңа да Тәбрис абый чәчүгә 20 апрельдән дә иртә чыгып булмаячак дип фаразлый.