”Яңа абзар да салып бирде, эшлә генә”, дип куанышалар чапшарлылар (+фоторепортаж)

Чапшар фермасында ике савым сыерлары абзары бар, 30 градустан артык суык көннәрдә дә абзарлар җылы, каралган, чиста, малларның алдында туклыклы азык. Ашатуга килгәндә, җәмгыять җитәкчелеге рационга зур игътибар бирә, без килгәндә дә сыерлар кукуруз орлыгы белән катнаш витаминлы азык ашый иде. Сыер савучылар һәр абзарда өчәр кеше эшли, беренчесендә: Вера Ватлецова, Гөлсимә Камалова, Фирдәүсә Сәлахова, икенче абзарда Резеда Сабирҗанова, Рузилә Газизова, Ризәлә Камалова. "Иртәнге 4 тулып 15 минуттта өйдән чыгып китәм инде, - ди Нормабаштан вахта машинасы белән алты ел инде йөреп эшләүче Резеда Сабирҗанова.- Сәгать 6нчы яртыда савым башлана. Һәр сыердан көненә 17-18 литр сөт савып алабыз." Резеда хезмәтеннән канәгать, хезмәт хакыннан да зарланмый. Иптәше Газинур да әлеге җәмгыятьтә эшли, алдынгы шоферларның берсе. Мәктәпне тәмамлап, Норма һөнәр лицеенда тегүчелек һөнәрен үзләштергән Резеда башта җәмгыятьнең тегү цехында эшли башлый , кыскарту җилләренә эләккәчтен, язмышын Нормабаштагы сарыкчылык фермасы белән бәйли, кыскасы, кайнанасы урынына кереп кала, сарык беткәч, үгезләр үрчетә, аннан Чапшар фермасына сыер саварга күчә. Резеданың эшен яратып, тыныч күңел белән башкаруы йөзенә чыккан, чөнки гаиләсе аңа нык терәк, "кайнанам кичен эштән кайтышка сыерны да савып куя, сугыш чоры баласы булган кайнатам да бик акыллы, кеше хәленә керә белүчән", ди ул якыннарын мактап. "Сыер савучыларның һәммәсе дә бик уңган, эшләрен күңел биреп башкаралар, рәхмәт", ди ферма мөдире.

200 башка исәпләнгән яңа комплекс җиткергәннәр, читтән профессионаллар китертеп, төгәлләп бетерәсе эшләре генә бар икән, "аннан комплекс тулы көченә эшли башлаячак", ди ферма мөдире Фәнил Габделхаков. Анысы инде бөтенләй башка, сыерларны да билгеле бер урында гына савачаклар, савасың да эшең бетә, мал астын җыештыручылар биредә аерым булачак икән. Хезмәт кешесенә ял итү, чәйләп алу, киенү-чишенү, юыну бүлмәләре дә каралган, мал табибына да аерым кабинет булачак. Мал табибы биредә, күркәм хезмәте белән еш телгә алынучы Гөлүсә Габделхакова, вельдшер гына мин дип тыйнаклык күрсәтсә дә, әлеге ханымның җаваплылыгында 570ләп баш малның исәнлеге-саулыгы. Профилактика эшләрен дә алып бара, дәвалый да, йөгертә дә, осеменатор да... тормыш иптәше - ферма мөдире Фәнил әфәнде белән гаилә тормышын да, ферма эшчәнлеген дә камил алып барырга тырышалар. Балалары инде зурлар, Казанда уку йортларында белем алалар, өчесе дә эшләп укыйлар, ди Фәнил абый бер горурлык хисе белән.
Тагын бер абзарда Фәнил Сәләхетдинов кул астында яшь имчәк бозаулар тәрбияләнә, әлеге гаять тә җаваплы, катлаулы, четерекле хезмәтне башка фермаларда, гадәттә, хатын-кыз башкара, чөнки ул бозаулар сабый бала караудан ким түгел, җан тынычлыкларың югала алар белән. Ә менә Фәнил абый зарланмый, чирләмәсеннәр генә, карарга гына була, ди.

Язма башында ук әйткән аркалы абзарлардагы бозауларны ирле-хатынлы Гөлнара һәм Илнар Камалиевлар тәрбияли, аларның хезмәтләре дә мактауга лаек.

Җәмгыятьне алга җибәрим дип күпме генә тырышма, нинди генә төзелешләр алып барма, яңалыклар кертмә, барыбер кеше факторыннан башка гына алга китеш булмаячак. Чапшар фермасында да 21 кеше эшли, һәм һәрберсе үзләренә тапшырылган хезмәтне җиренә җиткереп башкара. Алга таба да шулай дәвам итсен, әнә бит, җәмгыять җитәкчесеннән дә ничек канәгать алар - "Яңа абзар да салып бирде, эшлә генә", дип куанышалар.