«Яӊа тормыш»ныӊ мөмкинлекләре зурдан (+фото)

Хуҗалык рәисләренеӊ, тармак белгечләренеӊ халык алдында хисап тотуы, алда нинди эшләр торуын һәм бурычларны аӊлату да гаять әһәмиятле. Шушындый җыелышларныӊ чираттагысы Яӊгул авылы мәдәният йортында узды. Әллә инде сүтеләчәк бу бинага чыгым тотып тормыйбыз, дип, әллә инде ягып-ягып та җылытып булмый, 2018 елда төзү фаразланган мәдәният үчагыныӊ дөрес урында сайлануын исбатларга тырыштылар – ничек кенә булмасын, суык бинада ике сәгатьтән артык утырганда салкын сөякләргә кадәр үтте. Шуӊа да карамастан, яӊгуллылар бу юлы да түзем халык икәнен расладылар, чыгышларны ахырына кадәр тыӊладылар.

Хисапларныӊ тәнкыйть күзлегеннән ясалганын, файдаланмаган һәм кулдан җибәрелгән мөмкинчелекләрне киӊ яктыртылуын әйтеп узарга кирәк. Ә шулай да, алга максат куйганда, үрләрнеӊ нигәдер артык зур булмаганын билгеләүләрен күзгә ташланды. Бу турыда җыелышта катнашкан Балтач муниципаль район башлыгы Рамил Нотфуллин да басым ясап әйтеп китте. Бүгенге чорда ирешелгәннәргә генә канәгать булып, артыгын көчәнми тормыш алып булмый диде ул. «Яӊа тормыш» хуҗалыгыныӊ күрсәткечләрен зурлык ягыннан үзе шикелле хужалыклар белән чагыштырганда бу ачык күренә. Игенчелек өлкәсендә файдаланмаган резервлар бихисап, рапс үстерү һәм сату, кукурузаны орлыкка игү, бәрәӊгене тотрыклы уӊыш бирүче культура итеп тәрбияләү – боларр барысы да зур хезмәт сорый. Терлекчелектә, бигрәк тә сөт җитештерүдә яӊалыклар кертү бик мөһим. «Яӊа тормыш»ныӊ уӊышлары зурдан булына без ышанабыз, хуҗалыкныӊ һәм хезмәтчәннәрнеӊ моӊа бөтен момкинлекләре бар, дип нәтиҗә ясады район башлыгы.