Хезмәт

Алдынгы районнар исемлегендә Балтач та бар

"2015 ел сынауларын уңышлы үттек", - диде Татарстанның авыл хуҗалыгы һәм азык-төлек министры Марат Әхмәтов авыл хуҗалыгы тармагына нәтиҗәләр ясауга багышланган матбугат конференциясендә.

Чыннан да, 2015 ел авыл хуҗалыгы хезмәтчәннәрен тагын корылык белән сынады. Шулай булуга да карамастан, быел республикада җитештерелгән авыл хуҗалыгы продукциясе күләме узган ел белән чагыштырганда шактый күбрәк. Өстәвенә, Татарстан - җитештерелгән сөт күләме буенча Россиядә беренче урынны тота. Быел сөтнең гомуми күләме - 1,8 миллион тонна булыр дип фаразлана. Җитештерелгән ит күләме буенча республика Россиядә - икенче. Аның гомуми күләме 500 мең тонна булыр дип уйланыла.

Авыл хуҗалыгы продукциясен җитештерү арткан
Соңгы елларда Татарстанның авыл хуҗалыгы тармагы шактый катлаулы чор кичерә. 2000-2009нчы елларда республика ел саен 6 процент үсеш күрсәтсә, соңгы вакытта һава торышы агросәнәгать өлкәсендәге үсешне шактый тоткарлый. Марат Әхмәтов сүзләренә караганда, мондый шартларда җитештерелгән продукция күләмен билгеле бер дәрәҗәдә саклап калу да - зур җиңү.

Билгеле булганча, 2015 елда җыеп алынган ашлыкның гомуми күләме 3,5 миллион тонна тәшкил итте, уңдырышлылык - гектарыннан 22 центнер.
Кайсы районнар беренче?
Иң күп ашлык җитештергән район - Арча. Биредә барлыгы 150,8 мең тонна ашлык җыеп алынган. Уңдырышлылык - гектарына 29 центнер. Икенче урында - Актаныш, өченчедә - Азнакай. Уңдырышлылык аеруча югары булган район - Балтач. Биредә бер гектар җирдән якынча 37 центнер уңыш җыеп алынган.

Җитештерелгән сөт күләме буенча Балтач районы беренчелекне бирми. Биредә агымдагы елның 9 аенда барлыгы 48 мең тонна сөт җитештерелгән. Бер сыердан савыла торган сөт күләме буенча хәзерге вакытта Саба - беренче. Биредә бер сыердан якынча 17 килограмм сөт савыла. Ел башыннан ук санаганда исә, Әтнә районына тиңнәр юк. Биредә бу күрсәткеч бер сыерга 5,5 мең литр туры килә.

Реклама

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.

Иң мөһим һәм кызыклы язмаларны Татмедиа Telegram-каналында укыгыз


Теги: 250
Нравится
Поделиться:
Реклама
Комментарии (0)
Осталось символов: