Хезмәт

Балтач районы сөт җитештерү буенча каралган республика премиясенә дәгъва кыла

Татарстанда бер ел буе көн саен 200 тонна сөт җитештергән районнар премиягә лаек булачак.

Бүген әлеге премиягә Әтнә, Балтач, Кукмара районнары дәгъва кыла. Бер ел буе көн саен 200 тонна сөт җитештергән район Татарстан хөкүмәтенең махсус премиясенә лаек булачак. Бу хакта “Татар-информ”га Татарстан авыл хуҗалыгы һәм азык-төлек министрының икътисад һәм аграр үзгәрешләр буенча урынбасары Ришат Хәбипов әйтте. 
“Көн саен, ел әйләнәсендә 200 тонна сөт савып тапшырган районнарга билгеле бер суммадагы премия биреләчәк. Әз акча түгел, шул ук вакытта район өчен җаваплылыгы да зур”, – диде урынбасар. 

Ришат Хәбипов сүзләренчә, бүгенге көндә көн саен 200 тонна сөт савучы өч район бар. Болар – Әтнә, Балтач, Кукмара районнары. Тагын 7 районның әлеге сызыкка җитәрлек куәте бар. 

Исегезгә төшерәбез: элегрәк “Татар-информ” республиканың 10 районы сөт җитештерү буенча узган елгы күрсәткечләрдән калыша дип язган иде. “Ул районнар өчен бу премия стимул булырмы?” дигән сорауга Ришат Хәбипов: “Сөт акчасы – районның яшәү чыганагы. Башкача мөмкин түгел”, – дип җавап бирде. 

(Чыганак: "Татар-информ”, Чулпан Шакирова).

Нравится
Поделиться:
Реклама
Комментарии (0)
Осталось символов: