Районыбыз кырларында яңа уңышка нигез салу эше бара. Сабан культуралары чәчүне уңышлы гына башкаручылар исемлегендә бүгенге көндә «Кама» һәм «Яңа тормыш» җәмгыятьләрен мисалга китерергә мөмкин.
«Кама» игенче-механизаторлары: Хәбир Мөхәрләмов «ДТ-75» тракторын иярләп, бүгенгесе көнгә 340 гектар мәйданда, Шәрифулла Төхбәтуллин «МТЗ-1221» агрегатында 215 гектарда, Хәлиф Гафиуллин «МТЗ-82»дә 292 гектар мәйданда арпа, бодай, солы, борчак кебек бөртекле һәм кузаклы культураларны җир куенына иңдерделәр. Аларның фидакарь хезмәте нәтиҗәсендә чәчүлек мәйданнарның өчтән бер өлеше чәчелгән инде.
Ә менә «Яңа тормыш» игенчеләре чәчү эшенә 30нчы апрельдә 4 агрегат белән үк керешкәннәр. Алар инде игеләсе мәйданнарның яртысыннан артыгында чәчәргә дә өлгергәннәр. «ДТ-75» маркалы тракторларда Шамил Гыйльманов - 243, ә Рәфкать Гыйззәтуллин 176 гектар, «МТЗ-1221» агрегатында Нурислам Гарифиуллин 351 гектар һәм Илһам Шәрипов «МТЗ-80»дә 226 гектар мәйданнарда нәтиҗәле эш башкарырга өлгерделәр.
