Балтач хезмәт алдынгыларын хөрмәтләде

Шундыйларның берсе – Балтач муниципаль районы үсешенә зур өлеш керткән өчен «Балтач муниципаль районы алдындагы казанышлары өчен» медале белән бүләкләнгән Фәрит Мөбарәкша улы Мөбарәкшин. Ул «Маяк» җәмгыятендә 49 ел тракторчы булып эшләгән хөрмәтле ветеран. Җәйге чорда тәҗрибәле, тырыш механизатор әле дә хуҗалыкка ярдәмгә ашыга. Фәрит Мөбарәкшин «МТЗ-80» тракторы белән басудан печән һәм салам рулоннарын төяп тора. «Үз эшенең чын остасы ул Фәрит Мөбарәкша улы. Эшләү дәверендә нинди генә техникаларда хезмәт куярга туры килсә дә, бер эштә дә сынатмады, әле дә туган хуҗалыгын ташламый, гел ярдәм итәргә ашкынып тора. Хезмәтенә тугры калып эшләгәне өчен зур рәхмәтләребезне ирештерәбез», – дип рәхмәт һәм мактау сүзләре җиткерделәр «Маяк» җәмгыяте җитәкчелеге Фәрит Мөбарәкшинга. Рәсәй, республика һәм районның мәртәбәле бүләкләренә лаек булган, тырыш хезмәте белән макталган райондашларыбыз хакында алдагы битләрдән укый аласыз.