Чакрымнар йомгагын сүтеп

Моннан 70 ел элек Шеңшеңәр авылында әти-әнисен куандырып, Габделбәр абый Бариев аваз сала. Кешенең тормыш юлы белән танышыйм дисәң, аның хезмәт кенәгәсенә күз салырга кирәк. Ә менә Габделбәр абыйның ул кенәгәсендә бер генә язма: 1962нче елдан колхозда башта төрле эштә хезмәт куйган, ә 1969 елдан шофер... Менә шул көннән руль артында ул! 1990 елгы бензовозы белән ничә чакрым юллар үткәнен икесе генә беләләр. Ул узган чакрымнарның, башкарган хезмәтенең үлчәве юктыр. Авыл хуҗалыгы да нәкъ менә Габделбәр абый кебек тырыш, үз эшен яратып башкара торган көчле ир-егетләргә таяна.

- Разведкага барырлык ышанычлы кеше ул Габделбәр. Көндәлек иртәнге сәгать өчтән аяк өстендә булып, башта йорт тирәсендәге эшләрен башкара, ә аннан соң машинасын ялт итеп юып куя. Кайчан гына карасаң да, бер генә бөртек тузан да булмый аның машинасында, чисталыгы белән аерылып торучы шофер ул. Андый эш кешеләре бик сирәк, совет чорында тәрбияләнгән кеше булуы әллә каян билгеле, - ди "Маяк" җәмгыяте җитәкчесе Хәлил Хаҗиев.

Кайда гына булса да, нинди генә эшкә алынса да, Габделбәр абый кешеләр белән уртак тел таба. Чал чәчле бу ирнең тышкы кыяфәтеннән үк аның сабыр кеше икәнлеген чамалыйсың. Үз-үзен тыныч тотуы, һәр сүзне чамалап әйтүе, уйчанлыгы да аңа ниндидер бер, ир-атларга гына хас, күркәмлек өсти. Әлеге тыйнак ир үзе хакында сөйләргә яратмый. Әмма хезмәттәшләре аны бер дигән гаилә башлыгы, дүрт баласы өчен кайгыртучан әти, сигез оныгы һәм оныкчыгының яраткан бабасы буларак мактап телгә алалар.

Игелекле хезмәте белән авыл халкының абруен яулаган Габделбәр абыйга исәнлектә, якыннарына ышанычлы терәк һәм таяныч булып, балаларының игелеген күреп, авылдашларының горурлыгы, гел дә шулай җәмгыятькә кирәкле булып, күрше-тирәләр белән ярдәмләшеп яшәргә язсын.