“Дуслык” һәм “Алга” – беренче, икенче урында кайсы хуҗалык?

Көннәрнең кояшлы һәм коры торуы район игенчеләренә урып-җыюны вакытында тәмамларга зур мөмкинлек бирде. Авыл хуҗалыгы һәм азык-төлек идарәсеннән алынган мәгълүматларга караганда, 4 сентябрьгә “Дуслык”, “Сорнай”, “Бөрбаш”, “Сосна”, “Якты юл”, “Смәел”, “Кама”, “Кызыл юл”, “Алга”, “Арбор”, “Татарстан” һәм Тимирязев исемендәге хуҗалыклар урып-җыюны инде тәмамлады. Шулай да әлеге гаять тә җаваплы эшкә беренчеләрдән булып, “Дуслык” белән “Алга” хуҗалыклары нокта куйды. Шунысы сөендерә, әлеге кампания барышында районыбыз кырларында күңелсез хәлләр булмады, тыныч хезмәттә югары уңышка ирешеп, алтын муллыгыбыз җыеп алынды. Әлбәттә, әлеге эшнең төп мактауга лаек кешеләре – ул игенчеләребез. Алдагы еллардагы кебек, быел да урып-җыю эшләрендә комбайнчыларыбыз да, шоферлар һәм трактор йөртүчеләр дә зур җаваплылык тоеп, уңышны югалтуларсыз җыя алдылар. Урак эшләре барышында тырышып хезмәт куючылар атна саен район башлыгы тарафыннан хөрмәтләнеп, бүләккә лаек булып бардылар. Соңгы атна нәтиҗәләре буенча кемнәрнең вымпелга ия булулары турында киләсе санда укый алачаксыз.