Келәтләр туламы әле?

Әле урып-җыю кампаниясе тулы куәтенә көч алды дип әйтергә иртәрәк. Республиканың иң төньягындагы район буларак һәм, билгеле, язның, җәйнең унбиш көнгә соңаруы да эзсез калмады: быел уракка бераз соңарып керешелде, өстәвенә әле, һава торышына бәйле рәвештә, барлык басулар да тигез өлгермәгән. Хуҗалыклар, нигездә, көзге бодай һәм арыш суктыралар. Башка еллардан аермалы буларак, инде костер орлыгы амбарларга кайтарылып бетте.

Район авыл хуҗалыгы һәм азык-төлек идарәсеннән 2 августка алынган мәгълүматлар буенча, тулаем алганда, хуҗалык амбарларына барлыгы 7939 тонна ашлык кайткан. Шуның 2814 тоннасы 1 августта кайтартылган. Район буенча уртача уңыш бер гектардан хәзергә 34,1 центнер тәшкил итә. Тимирязев исемендәге хуҗалыкта 44 гектар мәйдандагы көзге бодайның бер гектары уртача 49 центнер уңыш белән сөендергән. Бу хуҗалыкта һәм «Татарстан»да уртача уңыш 42 центнер, ә “Дуслык” хуҗалыгында бу күрсәткеч – 41,20 центнер.
Димәк, эш башланды. Хәерле сәгатьтә, Игенче!