«Көннәрнең коры торган чагында ныклап эшләп калырга ашыгабыз»

«Труд»

– Урып-җыю эшләренә 31 июль көнне керешеп киттек. 155 гектар мәйдандагы көзге бодайны тулысынча сугып бетердек. Ул гектарыннан уртача 37,4 центнер уңыш бирде. Өлгергәнчә арыш һәм арпаны да җыйнап ала башладык, аларның әлегә уртача уңышлары 41,4 һәм 45 центнерны тәшкил итә. Быел борчак сортын алыштырып, «Ульяновец» дигәнне чәчкән идек, уңышыннан бик канәгать калдык, уртача 26 центнер булды. Игеннәрдән бушап калган басуларның саламнары җыелып, артыннан ук җир эшкәртелеп барыла. Быел иген кырларына дүрт комбайн чыкты, аларда үз эшләрен оста белүче комбайнчылар эшли: Валерий Степанов, Владислав Абрамов, Эдуард Овчинников, Владислав Ураков. Бөртекләрне кырдан ындыр табагына «КамАЗ» шоферлары Владислав Троцианский белән Василий Очинников һәм «ЗИЛ» машинасында эшләүче Юрий Чупанов ташый. Игенчеләребез дә, шофер-механизаторлар да тырышып эшли, көннәрнең коры торган чагында ныклап эшләп калырга ашыгабыз, – дип эшләре белән таныштырып үтте баш агроном Илдар Гыйләҗев.