“Маяк”та кемнәр сенаж сала?

Алдагы кышлату чорында малларны җитәрлек күләмдә яхшы сыйфатлы азык белән тәэмин итү өчен районның авыл хуҗалыгы җәмгыятьләрендә хезмәт фронтын киң җәелдереп эшлиләр. “Маяк”лылар да искәрмә түгел. Бүгенге көндә 3978 тонна сенаж салынган, 341 тонна чамасы печән әзерләнгән.

“Полесье”да эшләүче Ринат Габделхаков, Ринат Хәмидуллин, “Магдон”ны иярләүче Рафаэль Гарифҗанов печәнне чабалар, ваклыйлар һәм килгән тракторларга, машиналарга төяп озаталар.

Яшел массаны басу-кырлардан ферма базларына "КамАЗ" машиналары белән Вәгыйз Шәфигуллин, Вәсим Нәкыйпов, Фәнил Фатыйхов, Расил Мөхәммәдиев, Ришат Һадиев, Равил Гыйззәтуллин һәм “МТЗ-1221” белән Динар Фатыйхов, Илфат Әхмәтханов ташып тора.

– Яшел массаны таптатып торучы тракторчыларыбыз Илдар Сәхәбиев, Раниф Әскаров та мактаулылар рәтендә. Шулай ук көндез яшел масса ташудан тыш, төнге сменада “К-700” белән сенаж таптауда эшләүче Илфат Әхмәтханов турында да бары җылы фикерләр генә әйтеп була. Механизаторларыбыз күтәренке кәеф белән булсынга дип тырышып эшлиләр, – ди баш икътисадчысы Радик Вәлиев.