“Техникалар ярдәмгә килә” (фото)

- Бер генә яңгыр яумый калган көн дә юк дисәң дә арттыру булмас, башка җирдә яумаганы да бездә сибәләп булса да китә. Кояшлы, аяз торган ярты көнләп булса да, эшләргә тырышабыз. Үткән ел, быел алган яңа техникалар бик вакытлы булды, - ди хуҗалык җитәкчесе Айнур Нотфуллин. - Бер ел эчендә нәкъ менә терлек азыгы хәзерләүдә кирәкле 25 миллион сумлык заманча техникалар алдык. Ике комбайн, тараткыч һәм таратканны теземгә җыючы җайланмалар. Быелгы кебек явымлы елда тиз һәм оешкан төстә эшләргә кирәк булганда менә шушы техникалар бик булыша. Ә механизаторларыбызга мөмкинлек кенә кирәк, көне булса, алны-ялны белми эшли алар.

- Бездә барлыгы 1000 гектар күпьеллык үлән басулары бар. Шуның 200 гектарындагы люцерна сенажга салынды инде (мәгълүматлар 28 июньгә). Уңышы сөбханалла дия торган. Калганы да бик өметле күренә, - дип дәвам итә баш агроном Алмаз Шиһапов. - Берьеллык үлән басуларына да июнь аендагы җылы яңгырлар бик килеште, алардан да зур уңыш көтәбез. Бүгенгә 40 гектарда костер җыеп алынды, тагын шуның кадәре чабылган. Печән туплау бик яхшы темп алган иде инде, кызганычка, соңгы көннәрдәге көчле яңгырлар эшне туктатты. Быелгы һава шартларында люцернаны төргәкләү (фәнни атамасы - төргәкле сенаж) белән эшләвебез дә бик зур плюс булды. Бердән, дымлылык 65-70 процент булганда ук эшләргә ярый, икенчедән, бозаулар өчен бик әйбәт азык бу.

Бүген "Татарстан" басуларында өч чапкычта Фәнил Хамматов, Радим Иванов, Ринат Хөснетдинов, әйләндерү һәм җыюда Рафил Каюмов, Дима (рәсемдә) Ивановлар тулы бер конвейер булып эшли, сенаж салучылар звеносында исә Рифат Сабиров, Наил Вәлиевлар алты «КамАЗ» машинасын яшел масса белән тутырып кына тора. Төргәкле сенаж хәзерләүдә Фәнил Миннемуллин, Илсур Гарифуллиннар хезмәт куя. Барысы да тәҗрибәле, тырыш егетләр. Рәисләре әйткәндәй, мөмкинлеге дә булса... Әле бит хуҗалыкның өстәмә резервы - техникасы да, кадрлары да бар. Кояшлы көннәр генә кирәк.