Уракны төгәлләү турында фаразлар чынга ашсын!

Ильнур, 29 июль 2015 - 07:47

2769

Дүшәмбе көнне «Кызыл юл» белән «Игенче»дә көзге бодайны, «Маяк», «Смәел» һәм «Дуслык»та арышны турыдан урып суктыруга керештеләр. Амбарларга 467 тонна беренче ашлык кайтты. Хәерле сәгатьтә, игенче!

Уракны төгәлләү турында фаразлар чынга ашсын!

Быел районнан читтә игелгәннәрен дә кертеп, 37467 гектарда бөртекле һәм бөртекле- кузаклы культураларны җыеп аласы бар. Бу эшкә райондагы 20 авыл хуҗалыгы җәмгыятендә 99 комбайн әзерләнде. Егәрлекләре буенча уртача 79,6 шартлы комбайн дигән сүз. Аларның һәркайсына 446шар гектар басу туры килә. Комбайннар норманы үтәп барганда көн саен 1102 гектар иген суктырып алыначак. Бу һава торышы әйбәт торганда уракны 34 көндә тәмамларга мөмкинлек бирәчәк.

Район авыл хуҗалыгы һәм азык-төлек идарәсе белгечләре суктыручы комбайннарны барлап, кайсы хуҗалыкның уракны ничә көндә тәмамлау мөмкинлеген фаразлады. Һава торышы комачауламаса, уракны башлап «Алга» төгәлләргә тиеш. Саннарның беренчесе - суктыруда эшләячәк комбайннар, икенчесе - бер шартлы комбайнга туры килгән суктырыласы игеннәр мәйданы, өченчесе - барлык комбайннарның тәүлеклек җитештерүчәнлеге (гектарларда), дүртенчесе - уракны төгәлләү өчен кирәкле көннәр:

Алга	7	317	64	23
Тукай_исем.	5	398	49	28
Смәел	4	391	38	28
Татарстан	6	419	76	30
Маяк	5	415	59	30
Кама	6	413	65	30
Арбор	5	415	43	30
Дуслык	7	439	74	31
Игенче	8	465	87	33
Активист	4	477	45	34
Труд	4	481	48	34
Уңыш	3	469	32	34

Бу хуҗалыкларда комбайнчыларга тиешле эшшартлары тудырганда урып-җыюны үзләрендә булган көч белән бер ай эчендә тәмамлау мөмкинлеге зур. Әмма түбәндәге хуҗалыкларга моның өчен аеруча нык тырышырга туры киләчәк. Бер шартлы комбайнга туры килгән мәйдан шактый зур.

Кызыл юл	6	487	67	35
Яңа тормыш	6	493	70	35
Тимирязев_исем.	4	503	66	36
Якты юл	4	516	45	37
Сорнай	4	564	61	40
Борнак	3	616	25	44
Сосна	5	612	60	44
Бөрбаш	3	644	40	46

Идарә каршында оештырылган белгечләрдән торган комиссия һәр комбайнны эш барышында тикшереп, уракка хәзерлеген бәяләде. Тулаем алганда, урып-җыюга алар барысы да әзер дип билгеләнде. Бөртек ага торганнары күрсәтелеп, җитешсезлекләр урында ук бетерелде. Комиссия хуҗалыклардагы комбайннарның искерә баруына борчылу белдерде. Кыр корабларының 65 проценты 5-10 елдан да күп эшләгән. Аларның еш ватылулары, егәрлекләре ягыннан хәзерге заман техникасыннан нык калышулары эшне алга җибәрми. Быел районга 6 яңа комбайн кайтуы «Труд», «Активист», «Якты юл», «Кама», «Дуслык» хуҗалыкларында хәлне шактый яхшыртты. «Кама»да хәтта берьюлы ике комбайн алдылар. Яңа дип искесен дә бетереп ташларга ярамыйдыр. Әнә, Тимирязев исемендәге хуҗалыкта Фәнил Хәкимҗанов районга иң беренче кайткан 1989нчы елгы «Дон»ны тагын уракка әзерләде. Һәм әйтергә кирәк, узган ел да аның белән район күләмендә яхшы нәтиҗә күрсәткән иде.

Игенче механизаторларыбыз уракка алдан аяк киенеп яхшы хәзерлек белән килделәр. Ул урак вакытында үзен күрсәтер, игеннәр югалтуларсыз җыеп алыныр дип әйтергә тулы ышаныч бар. Һәм менә районның кайбер хуҗалыкларында уракның беренче көннәре матур гына башланып та китте.