Үзгәрешләр... сизелерлек

Бүгенге көндә күмәк хуҗалыклар кассасына көндәлек акча кертүче бу тармакта эш торышы алда торган беренчел бурычларны хәл итәргә нигез булып тора. Агымдагы елныӊ ноябрь аенда бу өлкә үсеш белән дәвам итте. Алдагы елда шушы чорга көндәлек 193 тоннадан артык сөт җитештерелсә, быел көндәлек сөт җитештерү 225 тонна чиген узды.

Сөт җитештерү һәм аны сату буенча лидерлар сафы әллә ни яӊармады. «Татарстан» хуҗалыгы көнгә 20 тоннадан артык сөт сата, «Кызыл юл»да исә бу сан 17 тонна, «Дуслык»та – 16 тонна. Алдагы ел белән чагыштырганда сөт сатуны хәйранга арттыра алган хуҗалыклар бар. «Татарстан» хуҗалыгы узган елныӊ шушы чорына караганда 4138 килограмм, «Дуслык» – 3144 килограмм, «Маяк» – 3060 килограмм сөтне артык тапшыралар. «Яӊа тормыш», «Кызыл юл», «Кама» һәм «Якты юл» хуҗалыкларында да бу өлкәдә уӊай үзгәрешләр сизелерлек.

Фото: автор