90 аресъем песянай (+фото)

Балтась районысь исполкомлэн кивалтӥсезлэн нырысетӥ воштӥсез Ильшат Галимуллин, социальной дурбасьтонъя отделлэн кивалтӥсез Алсу Гатиятуллина, социальной юрттэт сётонъя отделлэн кивалтӥсез Аниса Хайруллина, Бурнак гурт поселенилэн главаез Шамиль Хабибуллин, «Бурнак» обществоысь бригадир Вазих Хакимуллин, юбилярез ӟечкыласа, шунытэсь мылкыд каронъёссэс вуттӥзы. Россилэн Президентэзлэсь В. В. Путинлэсь ӟечкылан открытказэ, Балтась муниципальной районлэн главаезлэсь Рамиль Нутфуллинлэсь кузьымзэ, берпум уж интыысеныз но гурт поселенилэн нимынызы кузьымъёс сётӥзы.

Зинаида Александровна сярысь Вуж Турья гуртын вордскыса будэм, вань улонзэ та гуртлы сӥзем зэмос патриот шуид ке но, янгыш уз луы. Пинал но егит дыръёсыз туж секыт дырлы тупамын солэн. Озьы ке но, юн мылкыдо луыса кыльыны быгатэм со. Егит дыръяз гуртоеныз Быдӟым оже пыриськем, 7 ар служить карыса бертэм Кокров Михаил Николаевичен семья кылдыто. Шудо семьязэс эшшо но шулдыртыса, огез бӧрсьы огез 6 нылпиоссы вордско. Туннэ нуналэ ваньзы ик сӧл-таза. 4 ныл но 2 пи пичиысенызы ик анай-атайзылы юрттыса будо.

Зинаида Александровна кузпалэныз колхозын ужало. Михаил Николаевич усто лэсьтӥськись луэ. Колхозын мынэм лэсьтӥськон уже со аслэсьтыз бадӟым люкетсэ пыртэ. «Туннэ нуналозь но гуртамы атаен лэсьтэм амбаръёс, складъёс утисько. Туж тыршись, ужась вал милям атаймы! Одӥг ужлэсь но ӧз кышка, муш вордӥз. Улыны тыршиз. Атаймы 2015-тӥ арын 89 аресэн пӧлысьтымы кошкиз. Улэп луысал ке, туэ 8 ноябре солы 91 арес тырмысал… Куспазы умой гинэ, ог-огзэсты валаса улӥзы», - мӧзмыса буре ваё атайзэс нылпиосыз.

Туннэ нуналэ Зина апай нылыныз ӵош кузпалэзлы, Быдӟым ожысь ветеранлы, лэсьтэм коркаын уло. Нылпиосызлэсь, ӵыжы-выжыосызлэсь но 10 внукезлэсь, 7 правнукезлэсь гажамзэс шӧдыса улэ.