Адӟем карымон юбиляр

95 арес - кузь гумыр... Таӵе бадӟым юбилейзэ пусйыны, одӥг даурлы матэ улон сюресэз ортчем Бибиситдика Фасхетдиновалэн самой матысь адямиосыз: пиосыз-нылъёсыз, кенъёсыз-эмеспиосыз, внукъёсыз-правнукъёсыз, сузэръёсыз, кудо-туклячиосыз, вакчияк вераса, бадӟым узыр ӝӧк сьӧры туж трос куноос люкаськиллям вал. Районысь социальной дурбасьтонъя отделлэн кивалтӥсез Алсу Гатиятуллина юбилярлы Россилэн Президентэзлэсь но районысь администрацилэсь ӟечкылан кылъёссэс вуттӥз. Нош «Сурнай» хозяйстволэн валтӥсь экономистэз Анас Калимуллин гуртоез луыса шуныт ӟечкыланъёссэ но колхозлэн историяз пыртымон ужез понна тау каремзэ вераз.

Бибиситдика апайлы ас гумыраз сютэм улонэз но, шуг-секытъёсты но ӧжыт адӟыны тупамтэ. 1919-тӥ арын 3-тӥ ноябре Куюк гуртын вордскем ныллы улон аслэсьтыз эскеронъёссэ дася. 1921-тӥ сютэм арын улэп кылён - улонлэн кузьымез луэ. Семьяяз нырысетӥ нылпи луэмысьтыз, колхозъёс кылдон аръёсы ужаны кутскыса, арлыдоослы юрттон но палэнтӥ уг ортчы быдэ вуымтэ нылэз. 1941-тӥ арын 24-тӥ мартэ аслаз гуртысьтыз ик Фаляхетдин нимо пиен ӵош луыса, каньылэн гинэ улыны кутскыкузы, жалясьтэм Быдӟым ож кутске.

«Никахмы 11-тӥ июне луиз, нош 10 нуналскын ож кутскиз. Фаляхетдинэз фронтэ басьтӥзы, мон секытэн кыли. 1942-тӥ арын бадӟым нылмы Разия вордскиз. 40 нуналъем нуныме анайзыен кельтыса, колхозэ ужаны потыны тупаз. «Кызыл шахтёр» (табере «Сурнай») колхозын валъёс ути. Чыртыям куды ошыса ю тысь кизён, вал кыткыса бусы гырон, нюлэс кораса, Мендюш станцие валэн кор кыскан выллем секыт ужъёсын ужай», - шуыса тодаз вае егит дырзэ «лушкам» со аръёс сярысь юбиляр.

«Ож быриз. Гуртэ бертоно пиосмуртъёс но бертыса быдмизы кадь, нош мынам Фаляхетдинэ уг адскы. Со али 1945-тӥ арын 5-тӥ ноябре гинэ бертӥз. Туж юн сӧсырмем, контузия басьтэм, пельыз но начар кылэ. Озьы ке но солэн бертэмез со секыт, кышкыт аръёслэн одӥг югыт палыз луыса тодэ кылиз. Трос орден-медальёсыз вань вал, со пӧлын «Горд Кизили» орденэз но, ожысь бертэмез бере но трос кузьымъёсын пусйиськиз. 58 ар ӵош улӥмы, 1999-тӥ арын 10-тӥ январе югыт дуннеен люкиськиз. 7 нылпи будэтӥмы, туннэ нуналлы куинез кулэмын ни...», - шуыса вераз юбиляр.

Туннэ нуналлы Бибиситдика песяйлэн 14 внукез, 20 правнукез но одӥг правнукезлэн нылпиез вань. Кыӵе бадӟым узырлык! Вань кадь нылпиоссэ тодма, улон-вылонэнызы тунсыкъяськыса улэ.

Кузь гумыро луон выжыен но герӟаськемын, дыр. Юбилярлэн 1922-тӥ но 1938-тӥ аръёсы вордскем Минсылу но Равиля сузэръёсыз улэпесь али. Нош анайзы Карима 93 арессэ тырмытыны куинь толэзь кыльыса кулэм. Та ӝытын юбиляр сярысь туж трос шунытэсь кылъёс, чебересь тодэ ваёнъёс веразы.

Бибиситдика песяйлэсь 90 аресаз но кут кутаны быгатэмзэ тодазы уськытӥзы ке, районысь социальной дурбасьтонъя отделлэн кивалтӥсез Алсу Гатиятуллина, 90 аресъем юбилееныз ӟечкыланы лыктэм нуналаз бакчаяз муш утьыса ветлэмзэ тодаз вайыса паймытӥз. Со: «Бибиситдика апай «энергичной» песяй, ялан пыд йылаз, ужез яратӥсь. Соин но кузь гумыро луэм, дыр. Солэсь адӟем кароно», - шуиз.

Зэмзэ но, кыӵе секыт аръёс пыр потэм, улонлэсь курытсэ адӟем, нылпиоссэ, улонысь эшсэ, матысь ӵыжы-выжыоссэ берпуметӥ сюресазы келям Бибиситдика песяйлэн каньыл, бадӟым сюлэмо луэмезлы синмаськымон. Со али но котькуд выль нуналлы шумпотыса, луэмезлы тау карыса улэ, син медаз усьы!