Хезмәт

Адямиосты пыд куараоссыя тодмасько вал ни...

Кин гуртын котьку востребованной луэ? Кинэн гурт калык часэн-часэн вераськыны быгатэ? Кинлы котькуд учыре адямиез кылзӥськыны но быгатыны кулэ, со дыре ик кенеш но сётыны? Гуртын ужась вузкарисьлы.

Вузкарисьёсын асьмеос нуналлы быдэ пумиськиськомы. Сыӵе магазинъёсы, кудъёсаз вузкарисьёс пальпотыса пумитало, мылпотыса пыриськод. Котьма ке но вузкарисьлэн пальпотыса шуныт кыл верамез адямилэсь мылкыдзэ ӝутыны быгатэ. Соин но ӟеч мылкыдо луон — вузкарисьёс понна самой кулэ качество, мон малпамъя. Калыклэн таӵе визьмо веранэз вань ук: басьяськись котьку шонер. Та веранэн соглаш луись вузкарисьёслэн ужзы но капчиенгес мынэ, дыр. Соглаш луиз монэным гурт магазиназы трос аръёс ӵоже вузкарись луыса ужам Тагашурысь Татьяна Николаевна Зубарева но. Нылкышнолэн Казаньысь ТатПотребСоюзысь гинэ но 3 грамотез вань, кема аръёс ӵоже потребительёслэн кооперациязы мыло-кыдо ужамез понна РФ-ысь Центросоюзлэн Данъян грамотаеныз пусйиськем, со сяна районысь басьтэм грамотаосыз но лыдъяса быдтонтэм. †апак та шумотэ вузкарисьёс асьсэлэсь ӧнер праздниксэс пусъё. Таин валче Татьяна Николаевнаен вераськи.

— Татьяна Николаевна, тӥ магазинын кема аръёс ӵоже вузкарись луыса ужады шуыса тодӥсько. Ку но кытысен тӥ та уже интыяськиды?

— Магазинын мон 19 ар ӵоже ужай, 1995-тӥ арын кутски, 2014-тӥ арын ужамысь дугдӥ. Пенсие потэм бере но 5 ар ужай али, ветеран труда луыса пенсие потӥ. Нош магазины ужаны кутскытозь гуртысь ик фермаын ужай.

— Фермаын тросгес пудоен ужано ке, магазинын — адямиен. Секыт вал-а гурт калыкен ужаны кутскыны, огъя кыл шедьтыны?

— Котькуд адями аспӧртэмлыко. Котькудӥныз огъя кыл шедьтыны быгатыны кулэ, кыӵе адями луиз ке но. Мон ваньзы шоры огкадь учки. Юэм адямиосын но каньыл гинэ вераськисько вал. Кулэ луыкуз, пунэмен вуз но сётылӥ, адямилэн югдураз пыроно ук.

— Озьыен, басьяськисьёсын умой кусып возён — со тӥляд ужады самой кулэез? Оло, адямиосты кыскон понна кыӵе ке секретъёсты вань?

— Веранэз ӧвӧл, адямиез тунсыкъяськытыны быгатыны кулэ. Но со сяна али магазинын утялскыны но кулэ, котьку чылкыт мед луоз отын. Вузъёсты одно ик басьяськисьёслы ӵектоно, юанъёссылы ответ сётыны быгатоно. Сотэк ведь товар уг вузаськы. Мон ужаку ӵем ревизиос ортчытъязы. Соку Балтасьысь вуэм эскерисьёс милесьтым магазинмес, котьку чылкыт шуыса, ушъяса кошко вал. Ма, гуртоос но, тодмоосы но: «Милемлы тынад магазинэд кельше», — шуо вал.

— Сыӵе кылъёсты кылон — бадӟым шумпотон, дыр. Но со понна макем трос тыршыны но кулэ ук...

— Соиз, зэмзэ но, озьы. Морозильникен холодильниксэ но асьмелы учконо, выжзэ но миськоно. Али ӵем дыръя милемыз Казане гурт ярмаркаосы но лэзьязы. Ветлӥмы ведь, кытчы пырод. Ми коммунизмын будэм поколение: сылоно шуизы ке сылӥськом, мыноно шуизы ке — мынӥськом. Отказ сётэме ӧй вал ноку но. Кык нылпиосы соку пичи на вал, соосты но асьсэ понна кельтылыны тупаз. Озьы ик улӥмы... Ма, ваньзы адямиос озьы улӥллям, дыр...Ужаны кулэ бере.

— Таняпай, тӥ кема ужады вузкарон удысын. Опытты но бадӟым, адямиос борды но дышиллямды, дыр. Кызьы тӥ малпаськоды, вузкарись луон понна нимысьтыз дышетскон кулэ-а? Яке та удысын ужаса но ужлэсь вань секретъёссэ тодыны луэ?

— Дышетскон котькуд ӧрын кулэ, дыр, со. Мон тани ачим но ас дыраз вузкарисьёслы дышетон курсъёсты ортчи. Со вал Удмуртиын, Кизнерын. Дышетскем но дышетскымтэ — одӥг ӧвӧл ни. Милемлы  ведь психолог но луыны быгатыны кулэ. Мон, со мында ар ужаса, адямиосты пыд куараоссыя тодмасько вал ни. Син азяд пукты: пукисько мон чылкак огнам магазинын, нокыӵе куара но ӧвӧл. Та дыре магазин доры лыктэм куаоа кылӥське, ас поннам малпасько, кин меда та шуыса. И ведь котьку тодӥсько вал кин луэмзэ. Сыӵе тӥни тунсыко.

— Ма, малпасько, тунсыко моментъёсты трос луиллям, дыр. Калыкен умой кусып воземысьтыды, гуртоосты но тӥ сярысь умоен гинэ верало. Та самой дуноез, дыр, тӥ понна. Ђоген вузкарисьёслэн ӧнер праздниксы. Тӥледыз сюлмысь ӟечкыласьком но сӥзиськом тазалык но кузь гумыр, Татьяна Николаевна!

— Бадӟым тау. Мынам аслам но праздникенымы ӟечкыламе потэ вань валче ужам коллегаосме, эшъёсме. Нимысьтыз Михайлова Любаез но Овчинникова Валяез. Соос но магазинын вузкарись луыса ужазы. Милемыз ас дыраз «тройка» гинэ шуо вал (серекъя — ред.).

Огшоры уг верало, дыр, котькуд вузкарисьлы психолог луыны быгатыны кулэ шуыса. Таняпайлэн вераськемезъя ик валаны луэ, кыӵе со визьмо но сабыр нылкышно. Пинал дырысеныз ужаса будэм кышномурт кык нылпизэ пыд йылаз ӝутӥз, соос понна яратӥсь анай луиз. Куинь ар ини со уг ужа, дано шутэтсконын. Но шутэтскыны солэн воксё дырыз ӧвӧл — Таняпай пудо вордэ, трос сяська будэтэ. Гуртын уж пӧзе ук. Ма, мед гинэ пӧзёз, мед гинэ шудо улыны кылдоз тӥледлы, Татьяна Николаевна!

 

Нравится
Поделиться:
Реклама
Комментарии (0)
Осталось символов: