Акашкалы сӥзем фестиваль

Та фестиваль нырысетӥзэ 2011-тӥ арын ортчытӥськиз. Арысь аре со паськыт вӧлмыса мынэ. Отчы пыриськыны быгатэ котькин: дышетскись пиналъёс но, егитъёс но, арлыдоос но. Фестиваль ортче пӧртэм номинациосъя. Кылсярысь, «Лучшая пасхальная открытка», «Лучший рассказ», «Лучшее граффити» но мукет. Вераны кулэ: та ласянь асьме район данъяськыны быгатэ. Балтась ёрос туэ туж мыло-кыдо пыриськем котькуд конкурсэ. Со сярысь фестивалез йылпумъясь сӥё-дано ужрадын но верамын вал. Кылсярысь, Ципья шор ёзо школаын дышетскись Алеся Жукова, куинь пӧртэм конкурсэ пыриськыса (пасхалы сӥзем тужгес умоез суред, тужгес умоез граффити но видео), тужгес трос балл люкаса, гран-при утӥз. Нош Ульяна Кумаева, тужгес умой граффити кылдытэмез понна, синпель кузьымен пусйиськиз. Сюлмысен ӟечкыласьком соосты.

27-тӥ апреле ортчем бадӟым ужрадэ Балтась районысь кык приход пыриськиз: Ципьяысь святитель Гурийлэн черкез но Покчи Лӧзяысь черк (церковь в честь иконы Казанской Божьей Матери). Азьвыл ик вераны кулэ: фестивальын балтасьёсты котькуд ласянь ушъяса пусйизы.

Покчи Лӧзяысь черкез Людмила Фёдоровна Шустовалэн «Веретенце» шуыса нимаськись фольклор ансамблез ӵектӥз. (Нялтас вераса: Людмила Фёдоровна туж трос кужымзэ но мылкыдзэ сётэ ас ужезлы). Ансамбль учкисьёсты синмаськытӥз чебер дӥсьёсыныз, шумпоттӥз Акашкалы сӥзем кырӟанъёсын но эктонъёсын. Озьы ик пусйыны кулэ: Людмила Фёдоровна огкадь быгатыса ужа кызьы ке пичи пиналъёсын, озьы ик быдэ вуымтэосын но, малы ке шуоно солэн ансамбляз пӧртэм арлыдъем нылпиос пыро.

Ципья черкысен трос калык ӧз ке но мыны, выступлениоссы туж пуштросъем но чебер пӧрмизы. Та ласянь туж трос тыршем Ирина Евгеньевна Жукова. Бадӟым классъёсын дышетскись Аня Денисова но Диляра Камалова, озьы ик Ирина Евгеньевна ачиз сюлме пыӵамон кырӟазы. Алеся Жукова кылбур лыдӟиз.

Нимаз ик пусйыса вераны кулэ та сӥё-дано ужрадэн валче ортчытэм адӟытон сярысь. Солэн ужаз но асьме район лулысь-сюлмысь пыриськиз. Искусствоосъя школаысь художник-преподаватель Анастасия Данилова туж узыр, пуштросъем но аспӧртэмлыко киужъёсын адӟытон радъям вал. Мукет ёросъёсын ӵошатоно ке, тужгес узырез асьмелэн вал, шуыны кулэ. Отын мар гинэ ӧй вал: пӧртэм амалэн пужыятэм, керттэм арбериос, суредъёс... Огъя вераса, син мальдымон вал.

Тӥни озьы ортчиз асьме ёрос понна туэез «Пасхальное дарование» фестиваль - азинлыко но тунсыко. Ужрадэ пыриськемъёс трос шумпотон басьтӥзы, дыр, шуыса малпасько.

P.S. 27 апрель нуналэ ик Ципья культура юртын школаын дышетскисьёс Ирина Жуковалэн кивалтэмез улсын Акашкалы сӥзем концерт программа ӵектӥзы. Нылпиос учкисьёсты чебер кырӟанъёсын, эктонъёсын но сценкаосын шумпоттӥзы. Калыклы туж кельшем.