Анай кылзэс усто тодо

31-тӥ южтолэзе Ципья шоръёзо школаын этнокультурной компонентэн школаосын дышетскись пиналъёслэн «Диалог культур» шуэм ним улсын ортчем Улосвылкуспо научно-практической конференциязы сизьым секция ужаз шуыса гожтӥськеммы вал. Со ӟуч, бигер, удмурт, пор кылосбуръя, историяя но шаертодонъя, естественной наукаосъя но ӟуч но анай кылэз ӵошатонъя секциос. Шумпотымон, тросаз секциосын асьме ёросысь дышетскисьёс призо интыосты басьтӥзы. Кылсярысь, удмурт кылосбур секциын Ципья шоръёзо школаын 10-тӥ классын дышетскись Чернова Вероника (кивалтӥсез Чернова И.А.) 1-тӥ инты басьтӥз. 2-тӥ интыын Покчи Лӧзя школаысь 9-тӥ классын дышетскись Балтасева Кристина (кивалтӥсез Антонова Н.Л.) но Ципья школаысь 8-тӥ классысь Александрова Ольга (кивалтӥсез Григорьева А.В.). Сюлмысен ӟечкыласьком вормись дышетскисьёсты но соослэсь кивалтӥсьёссэс! Азьланяз но анай кылэз дышетонын, сое азинтонын, нылпиосты эскерон уже кысконын жадьытэк но пайдаё ужаны сӥзиськом.