Ӟаны шоръёзо школалэн отчёт концертэз ортчем

Та сярысь ивортӥз Сала Кушкет гуртысь Ольга Яковлева.

Ӝоген дышетскон ар йылпумъяськоз но нылпиослэн кема витем гужем каникулъёссы кутскозы. Нош со дырозь нылпиос отчёт концертъёсты возьмато.

Арлы быдэ сямен ик, Ӟаны школаысь дышетскисьёс пӧртэм номеръёс дасяллям — кырӟанъёс, эктонъёс, кылбуръёс. Шумпотымон, мызганэн шудӥсьёссы но луиллям.

— Вань классъёс туж умой концерт номеръёсты дасяллям вал, усто выступлениосынызы анай-атайёсты шумпоттӥзы. Дышетӥсьёс но палэнэ кыльымтэзы: сценка возьматонэ пыриськизы. Арлы быдэ сямен ик, туэ но школамылэн директорез Константин Грахов усто дышетскисьёсты, соослэсь анай-атайёссэс но дышетӥсьёссэс пусйиз. Озьы ик олимпиадаын вормисьёс но призёръёс директорлэн киысьтыз пичи кузьымъёсты басьтӥзы. Та концертлэн самой чебер но нылпиос, анай-атайёс понна тодазы кыльымон люкетэз вал, дыр, — пусйиз Ольга Яковлева.

Со сяна, «Арлэсь спортсмензэ», «Арлэсь активистсэ», «Арлэсь дышетӥсьсэ», «Арлэсь классэ» но пусйыны вунэтымтэзы. Зал тыр люкаськем калык котькуд концерт номерез, котькуд грамотаен пусъем нылпиез, дышетӥсез, анай-атаез кужмо кичабонъёсын пумитам. Огъя вераса, концерт огшокчемен ортчем, нокинэ но мылкыдтэм кельтымтэ, трос шумпотон кузьмам.