Асьсэ гуртсылэн патриотъёссы

Та гуртын ваньмыз но умой шуыса эн малпалэ. Проблемос вань татын но. Но мон гурт калыклэн улон-вылонэз, азьпаллы пуктэм планзы сярысь верало.
Инкуазьлэн одӥгаз самой чебер сэрегаз интыяськем Тагашур гурт. Бадӟым сюреслэсь шӧдскымон палэнын луэмысьтыз, кыӵе ке но мукет дуннеын уло кадь отын. Гурт пумын ужась фермаез адӟыса пайми, малы ке шуоно пичи гуртъёсысь фермаосты быдто, яке бадӟымгес гуртъёсысь фермаосын огазеяло, нош татын ферма одӥг бадӟым хозяйствоез тодэ вайытэ. Та сярысь фермалэн кивалтӥсез Валерий Митрофанов тазьы шуэ: «Ми ялан выльдӥськиськомы. Выль фермаосты лэсьтонэн ӵош, вужъёссэ но тупатъяськомы. Гурт калыкез «сюдӥсь» та бадӟым объектлы луыса ми тыр улыны быгатӥськом».
Жаляса верано, куке но умой гинэ ужам школа, клуб пытсамын. Нылпиослэн лыдзы кулэсмемен гинэ ӧвӧл, зданиослэн вужмемзы но талы муг луэм.
- Туннэ нуналэ гуртамы 18 аресозь 27 пинал вань, дошкольной аресъем - 12, соос пӧлысь 4-ез Ципья нылпи садэ ветло, нош кылемъёсыз доразы. Вордскемъёслэн но лыдзы ӧжыт ӧй шуысал, Тагашур выллем пичи гурт понна 2-3 пиналлэн вордскемез ӧжыт лыдпус ӧвӧл, - шуэ фельдшер Римма Закирова.
2014-тӥ арын выль ФАП лэсьтӥллям. Магазинзы но умой гинэ ужа, соиз районысь потребительёслэн обществозылэн вылэм.
- Мар кулэ, ваньмыз вань. Кулэ луись арбериосты заказэн но вайытыны луэ, - шуэ Валерий Егорович.
Клуб ӧвӧл шуыса, лулчеберет сярысь уг вунэто тагашуръёс. Выль арез но, Сабантуез но, Акашкаез но ортчыто татын. Районысь социальной дурбасьтонъя отделын ужась гуртозылэн, Наталья Закировалэн, тыршеменыз, ферма юртэ быдэс калык люкаськыса, Выль арез пумиталлям. Акашка праздникез но шулдыр ортчытӥллям.
Гуртады егитъёс кылё-а шуыса тунсыкъяськи. «Кылё, клубез радъяны но ӵапак егитъёс мылкыд каризы», - шуо. Тагашуръёс вуж клубзэс ремонт карыса, культура очагзэс улӟытон пумысен малпанзэс «Труд» хозяйстволэн кивалтӥсезлы вуттэмзы бере, Рашит Хадиев юрттоз шуыса оскытӥз.
Клубен кивалтыны адями но шедьтӥллям ини: Ирина Конькина та уж борды басьтӥськыны мылкыд каре, пе. Озьыен, ремонт каремзэс гинэ витёнзы кыле.
Гуртысь урамзэс радъяны, мукет поселениосын кадь ик, самообложение амалэн люкам уксёзы юрттэм. Ошмессэс но огъя кужымен радъяллям. Огъя вераса, шумпотонзэс но, котӝожзэс но шори карыны быгатӥсь калык улэ татын. Озьы ик соос ас малпанзэс но вераны быгато. Котькуд юртын «Азьлане» газетэз басьтэмзы но зэмос патриот луэмзэс юнматэ.