Атай юртысь кен

Усьтэм капкатӥ гидкуазязы пыремен, коркасен пыжем нянь зын лӧсъяськиз. Магазинын пӧртэм нянь вузаськем дыре но юртлэсь шунытсэ утьыса, корка ческыт зын вӧлмытыса нянь пыжон - та ини кенлэсь быгатэмзэ, улонлэсь тыр луэмзэ юнматэ. Школаысь бертэм пиосыз Айнурен Айназ анайзылэсь пӧсь няньзэ витё, Гадиля анайзыеныз аслаз Савия анаез но - кык туклячиос - вераськыса чай юо. Нош ик «Мар кальёсыд вань, анай?» шуыса, Гадиля апайлэн нош одӥг кенэз Каусария лыктӥз. Вакчияк вераса, корка пушкын сюлэмлы каньыллык сётӥсь мукет улон пӧзе. Семьялэн йырыз Габдельнур понна та огшоры маке - дышем улон. Атай юрт тани таӵе луыны кулэ, дыр, со. Нош ваньмыз понна но сюлмаськыса Лилия ветлэ. Ымныраз пальпотон, нош чырткем киосыз котькытчы вутско. Бен, озьы ӧз ке луы, ужан сюресаз бадӟымесь азинсконъёсы вутскыны ӧй быгатысал.

Лилия конкурсын адӟемъёссэ но вераз. «Мукет аръёсы но районын ортчем профессиональной устолыкъя конкурсъёсы пыриськеме луиз. Кылсярысь, Нуринерын ортчытӥськем конкурсысен кузьымъёсын бертӥ. Соин ик шоркарын ортчем бадӟым конкурсын теорияя заданиосты практикаын кутӥськись нунал потэм ужъёсты огазеяса экзамен кутон капчиен сётӥськиз. Оло шуд пальпотӥз-а - удалтӥз. Министерство Германиын стажировка ортчон понна путёвка кузьмаз. Кунгожсьӧры ик потыны уз луы ини, нош аслэсьтым устолыкме нош но волятыны, вылӥгес показательёсы вутскыны тыршисько», шуыса аслаз малпанъёсыныз вошъяськиз со.

Лилия ужан сюрессэ 19 аресэн ик кутске. Школаез йылпумъяса, Нурмаысь профессиональной лицейын повар-кондитер ӧнерез басьтӥз ке но, гуртысь пиен, «Унышысь» ушъямон механизаторен Габдельнурен семья кылдытыса улыны кутскемзы бере, анаез доры фермае ужаны лыктэ. Лилиялэн валтӥсь пыкетэз но наставникез анаез луэ. Савия Фаттахова но хозяйствоысь азьмынӥсь скал кыскись - 30 арлэсь уно фермаын скал кыске. Тани Лилия но 10-тӥ арзэ анаезлэсь адӟем карыса вылӥ показательёсы вутскыса, азинлыко ужа. Соос кыкназы ужаса, нунал потэм 100 йыр скал кыско, ветылъёсты утёнын но опытсы бадӟым.

Савия апай Лилия нылыз сярысь: «Со пичиысен сузэрезлы но вынызлы адӟем карымон апай, атаезлы но мыным юрттӥсь луыса будӥз. Кык нылы но фермае мыным юрттыны лыкто вал. Тани Лилия мынам сюрестӥ кошкиз. Фермаын но ужа, дораз но котьмалы вутске. Ваньмыкуз керттӥське, вуриське но али со. Сиён пӧзьтыны но туж усто. Мантыез сокем ческыт пӧзьтэ. Пыжиськем сиёнъёсыз но туж удалто. Гадиля туклячи шу пироглы пушкессэ дасяз ке, Лилия пирог пыжыса ӝӧк вылэ пуктэ», - шуыса ушъяса но, нылыныз данъяськыса но басьтӥз.

Каусария ичименез но: «Атай юртысьтызы ӵыжы-выжыос уг быдмо. Со котьку сайкыт ымнырен куно каре. Юрттэт, кенеш кулэ луиз ке но, солы вазиськиськомы. 4 ар талэсь азьло атаймес Кавиез берпуметӥ сюресэ келянын но Лилиялэн люкетэз бадӟым луиз», шуыса вераз. Лилия - атай юртысь кен. Нырысь 6 арзэ атайзыеныз Кавиен, анайзыеныз Гадиляен, картэзлэн сузэреныз Гамиляен ӵош улӥллям. Кави агай кулэм, Гамиля картлы бызем. †ошен шулдыр гинэ улэм семьяын мӧзмыт кыле. Соку Лилияен Габдельнурлэн тыршеменызы, сабыр луэменызы, будӥсь пиосыз, дыр ортчемен та бушлыкез быдэс каро. Али ялан но огшоры, шонер кыло бабайзэс буре ваё, асьсэсыз будэтэм Гамиля апайзылэсь мӧзмо. Тухватуллинъёс январь толэзе семья кылдытыса улыны кутскемзэс пусйыса ортчыны дасясько. Лилиялэн кен луыса лыктэмезлы 10 ар луэ. Лилиялы нош кема аръёс ӵоже семьязэ шунтӥсь очаг, картэзлы Габдельнурлы пыкет, нылпиосызлы кадырлы анай луыса улыны мед кылдоз!