Азьпалыз оскымон

Огъя вераса, паркысь ужъёслэн туннэ нуналлы югдурзы начар ӧвӧл. Татын Ильназ Якуповлэн сӥль продуктъёсты дасян предприятиезлэн масштабез арысен аре бадӟыма. Соос огъя вераса пельнянь лэсьтон ужен выро. Пельняньзэс халяль сӥлез изыса поттэм фаршлэсь киын лэсьто. Та ужын нунал потэм 18 нылкышно тырше. Кык адями сӥль дасяса улэ. Дась пельняньёсты 7 районысь 350 магазинъёсы асьсэос нулло. Ӟечлыко сӥлен дорын кадь киын лэсьтэм продуктъёсты курисьёс трос вылэм. Соин но производствозэс эшшо но паськытатыны малпало. Со понна выль цехъёс дасяло. Сӥльлэсь котлетъёс но мукет пӧртэм продукция но потто. Кылем арын 20 миллион 900 сюрс манет тыр продукцизэс вузаллям. Нош парклэн огъя доходэз 27 миллион манет луэм. Ужасьёслэн толэзьем шоро-куспо уждунзы 15-18 сюрс манет. Со сяна, быдэс социальной пакет но чакламын на.

Огъя вераса, «Халяль» индустриальной парклэн азьпалыз оскымон. Таяз арын ик ини татын 50 миллион манетозь вуз поттыны чаклало. Ужасьёслэсь лыдзэс но кык поллы тросгес карыны, 100-озь вуттыны малпало. Туэ лэсьтӥськись выль зданиос нимаз ужбергатӥсьёслы, асьсэ ужзэс азинтон понна, капчиятэм дунэн арендае сётӥськозы. Арендае офис зданиосты но ӵекто. Балтасьысь Раиф Гарифуллин ини паркысь арендае музъем басьтыса, здание лэсьтыса аслэсьтыз ужзэ усьтэм. Секыт грузъёс ӝутъян понна но машина кыскан понна лентаос лэсьтыны кутскиллям. Со дыре ик лэсьтӥськон ужъёсты пумаз-йылаз вуттонъя но ужъёс нуисько, азьланяз зданиез шунтон уж но быдэстӥськоз. Раиф но ог дас мында адямилы, уж сётыса, уксё ужаны луонлык кылдытэм. Балтасьлэн Казань сюрес вылаз интыяськем паркын тӥни сыӵе азинлыко малпанъёсын уло но ужало.