Балтась ёросын егитъёслэн православной движенизы луоз

Южтолэзе асьме ёросамы Казань епархиысь егитъёслэн «Казаньысь православной доброволецъёс» движенизылэн представительёссы вуылӥллям вал. Соосын пумиськем, вераськем но матынгес тодматскем бере, отец Рафаил Балтасьысь егитъёслы но сыӵе движение радъяны кулэ вал шуэм мылкыдзэ вуттӥз. Та малпанэныз егитъёсын пумиськонэ вуэм дышетскисьёс но соглаш луизы.

— Туала улонын адямиос понна туж трос гочатонъёс кылдо. Тужгес но пиналъёслэн, егитъёслэн. Кылсярысь, огъёзоосыз спирто юонъёсты юыны, тамак кыскыны, урод кылъёсын вераськыны кутско ке, пинал муртлы ассэ сыӵе юлтошъёсын возьыны секытгес луэ. Тросаз учыре солэн но, эшъёсыз выллем, юэмез, тамак кыскыны кутскемез потоз. Кин ке вералоз, семьяын визьнодамез умой ке, нылпи сыӵе югдуре уз вуы шуыса. Но ведь та анай-атай бордын гинэ уг луы, тросэз нылпилэн, егит муртлэн компаниез бордысен кутске. Соин но православной движение кылдытӥмы ке, егитъёс быгатысалзы умой ужъёсын вырыны, ог-огенызы пумиськылыны, умой компаниын луысалзы, — шуэ отец Рафаил.

Бен, районын кылдытэм движение Казаньысь движение кадь театральной студия, киноклубъёс радъяны ӧз ке но быгаты (кин тодэ, улыса-улыса, оло, быгатоз но), движение пыриськись егитъёс люкаськыса шулдыр но пайдаё дырзэс ортчытыны быгатозы. Кызьы пусйиз отец Рафаил, та движенилэн валтӥсь малпанэз егитъёсты черке ветлыны косон ӧвӧл — соосты люкаса пӧртэм пайдаё ужрадъёсы кыскон. Ӵошен луоз чорыгаса ветлыны но, футбол шудыны но, туж умой луысал та движенилэн рамкаосаз оген улӥсь но инвалид пересьёслы юрттон. Соосын пумиськон гинэ но ма быдӟа  пайда вайыны быгатэ ук.

Азьпалан «Вконтакте» вотэсбамын Балтась егитъёслэн православной движенизылэн группаез кылдытӥськоз, кудаз ортчем но вуоно ужрадъёс сярысь тодыны луоз. Кин мылкыд каре та движение итӥськыны, вазиськыны кулэ Покчи Лӧзя яке Ципья черке. Ойдолэ, огазеяськоме, егитъёс!