«Берёзка» нош ик шулдыртӥз (фото)

Покчи Лӧзяын «Берёзка» праздникез ортчытон чебер традицилы пӧрмиз ини.  Акашка бере 50-тӥ нуналаз асьмеос Семыкез пусйиськомы. Азьло дырысен та празднике черкез но, юртъёсты но кызьпу вайёсын чебермаллям. Та писпулы сӥзьыса, Покчи Лӧзяын арлы быдэ «Берёзка» праздникез ортчыто.

Туэ но та чебер ужрад, мукет аръёслэсь висъяськытэк, котыр улосысь трос куноосты люкам.

— Та праздникез туж кема аръёс ӵоже ортчытӥськомы ини, мон ужаны кутскем дырысен гинэ но ог дас пол ортчытӥ ини, — шуэ Покчи Лӧзя Культура юртысь устолыкъя кивалтӥсь Галина Петрова. — Но сомында адями, кӧня туэ люкаськиз, огпол но луэмез ӧй вал кадь. Асьме ёросысь туж трос гуртъёсысь куноос вуизы, Апазысь но лыктэмъёс вань вал. Туж шумпотӥсько, сомында адями, праздникмес яратыса, гажаса, ми доры люкаськиз шуыса.

Праздникез ортчытэмлэсь азьло, Галина Денисовна Покчи Лӧзя Культура юртысь активзэ люкаса кенешем, кызьыгес праздникез радъяны кулэ меда шуыса. Огъя кужымзэс поныса, кенешыса радъям праздниксы калыклы но туж кельшымон луэм. Ужрадэ лыктэмъёс табанен но чаен кунояськыны, пӧртэм шудонъёсы пыриськыны (чорыг кутон, гира ӝутъян, канат кыскан, сапег кутчаса бызён, горшок пыргытон но мукетъёсыз) быгатӥллям. Пиосмуртъёс 50 килограммъем юэн пуйыосты но ӝутъяллям. Нялтас вераса, Апазысь лыктэм куно, вормись луыса, со юлэн кузёез луэм. «Сурнай» обществоын ужась тужгес бадӟым стажен скал кыскисьёсты — Романова Людмила Валентиновнаез но Волкова Татьяна Ивановнаез — «Елмай» кооператив микроволновой гуръёсын шумпоттэм. Праздникын озьы ик ӟечкылаллям гурт поселениысь берпуметӥ вордскем нылпиез но, 12-тӥ куартолэзе вордскем Анна Кузьминаез. Калык понна вузкарон точкаос ужазы, нылпиосты батутъёс шумпоттӥзы. Огъя вераса, та ӝыт анай-атайёс понна но, нылпиос понна но зэмос праздниклы пӧрмиз. 

Фото: Галина Петрова