Борис Григорьев — яратӥсь атай но бабай

Кема аръёс ӵоже Покчи Лӧзя гуртын улӥсь Григорьев Борис Аркадьевич 20-тӥ куарусёнэ 90 аресъем юбилейзэ пусйиз.
Юбилярез Балтась районлэн главаезлэн воштӥсез Наиль Сабирзянов, социальной дурбасьтонъя отделлэн кивалтӥсез Алсу Гатиятуллина, Покчи Лӧзя гурт поселенилэн кивалтӥсез Сергей Мухин ӟечкылазы. Борис Аркадьевичлы соос РФ-лэн Президентэзлэсь ӟечкылан открытказэ, район главалэсь Таукарон гожтэтсэ вуттӥзы. Та нуналэ юбилярез кивалтӥсьёс сяна самой матысь ӵыжы-выжыосыз но ӟечкыланы вуизы.
Григорьев Борис Аркадьевич вордскемын Саба ёросысь Завод Нырты гуртын. Семьяязы соос куинь кузя нылпиос луиллям — апаез Капитолина, Борис, выныз Виктор. 1941-тӥ арын Григорьевъёслэсь атайзэс жугиськонэ басьто, нош 1942-тӥ арын со ивортэк ыше. Анайзы куинь нылпиосыныз огназ кыле, котькудзэ пыд йылаз султытыны быгатэ. Кык агайёс, Борис но Виктор, зарезь флотын служить каро. Борис, ньыль арлэсь кемагес служить карыса, вордскем палъёсаз бертэ но Казаньысь электротехнической заводэ мастер луыса ужаны интыяське. Кема ик улытэк, Борислэн анаез но кулэ. Апаез картлы кошкыса Североуральске улыны выже, Виктор кышнояськыса Казаньын улыны кутске. Нош Борис кӧня ке дырлы кошке Набережной Челные. Отын но со заводын мастер луыса ужа. Дыр ортчыса выльысь Казане бертытске. Казаньын тодматске нырысетӥ кышноеныз Розаен, кузпалъёслэн Игорь пизы вордске. Но, жаляса верано, Роза кузпалыз висьыса кулэ. Соин улон Борис Аркадьевичез вуттэ Балтась районэ. Татын со кыкетӥ кузпалэныз, Таисия Яковлевнаен, тодматске. Соос семья кылдыто но 1975-тӥ арын соослэн Ирина нылзы вордске.
— Мон вордскем бере анаен атай Карелино гуртын улыны кутскиллям, собере Покчи Лӧзяын юрт но ӝутӥзы. Атае Карелиноысь заводын мастер луыса ужам, нош Покчи Лӧзяе улыны выжемзы бере Карадуванысь мебель фабрикаын ужаны кутскем. Ӵапак отысен ик дано шутэтсконэ но потэм, — валэктэ Ирина Борисовна, юбилярлэн нылыз.
Борис Аркадьевич котьку ужез яратӥсь, тыршись ворогорон луэм. Соин гурт улон солы туж сюлэмызъя. Али, бодыен ке но, ачиз ветлыны но быгатэ, умой вераське, йырсазез сайкыт. Григорьевъёслэн куинь внукъёссы вань. Туннэ нуналэ Борис Аркадьевич ас семьяеныз — кышноеныз Таисия Яковлевнаен, Ирина нылыныз, Ильмир но Руслан внукъёсыныз Покчи Лӧзяын улэ. Игорь пиез но Владислав внукез Казаньын уло.
— Анай-атаймес гажаса, валче тупаса улӥськомы, — шуэ Ирина Борисовна. — Атай — туж ужась но яратӥсь атай но бабай. 90 аресэз шоры учкытэк, со ас нылпиосыз, внукъёсыз понна туж сюлмаське, таза улон сям нуэ.
Борис Аркадьевичез семьяяз туж гажало но ярато. Ирина Борисовна котьку вӧзаз, Игорь агаез но семьяеныз ӵем куное бертыны тырше. Огъя вераса, Борис Аркадьевич пересьмон даурзэ каньыл но шудо ортчытэ.

Вакиф Закиевлэн туспуктэмез..