Хезмәт

Быдэсмиз малпанмы

Сюресъёсты, урамъёсты тупатъян-лэсьтон - быдэс Россиын одӥгез бадӟымез быдэстоно ужпуммы.

Калыкмылэн кивалтӥсьёслы тросэз ӝожтӥськонъёсыз, вазиськонъёсыз но ӵапак та ужпумен герӟаськемын. Нюко-гопо, дэри урам ужась адямилэсь мылкыдзэ куашкатэ, гуртлэсь чебер туссэ сӧре. Со бордын гинэ ӧвӧл: пӧртэм кышкыт учыръёс луыку (авариос, тылпу, секыт висёнъёс), транспортлы одно ик дыраз гуртэ пырыны но кулэ.
Сюресъёс, урамъёс... Соос адямилэн вирсэръёсызлы кельшо ук. Соин ик сюресъёс котьку умоесь луыны кулэ. Трос курадӟизы карек-сермаос урамзы пыронтэм-потонтэм луэмен. Няньлы сӥзьыл но тулыс дэри коласа, бадӟым сюрес вылэ потыса, тросэз ай пенсионеръёс, нянь машиналэсь вуэмзэ витьыса, зор-кот улын кык час ёрос но сылылэмзы вань. Легковой машинаосты гурт пуме, бадӟым сюрес вылэ ик кельтылӥзы... Районысь кивалтӥсьёс но тае адӟытэк ӧз улэ. Соос пӧлын ураме машинаен нӧдӥсьёсыз но луылӥзы. Но номыр уд кары, ваньмыз коньдон борды пыкъяськемын ук.
Туэ милемлы шуд усиз - праздникъёсозь урамез тупатъян йылпумъяськиз, 8 миллион манет тыр уж быдэстэмын. Р.М.Ильясовлэн усто кивалтэмез улсын, тыршыса ужаз котькудӥз сюрес лэсьтӥсь, куддыр ӝыт 7-8 часозь но ужаллязы. Нырысь нюко-гопо, вуэн, дэриен тырмем ураммес ӵошкатӥзы, чылкытатӥзы, юнматӥзы, собере луоен но векчи урал изэн шобыртӥзы, дуртӥз канава гудӥзы, кӧня ке выжлы корт гумыос тыризы. Нимынызы ик ушъяса верам потэ мастерез М.Каюмовез, шофёръёсты Ильясэз, Ринатэз, Фанисэз, Азатэз, Ильмирез, экскаваторщикъёсты Накипов Ранисэз, Вафин Ильнурез, погрузчикен ужась Гарапшин Ильдарез, грейдеристэз Хузин Рифатэз, каткистэз Кутдусов Рамилез, автобус шофёрез Равилез, луо, из, асфальт вӧлдонъя мастерез Осипов Радикез, труба тырисьёсты Валиев Раисэз, Мифтахов Радикез, Ягфаров Айратэз, Гимадиев Ришатэз, Загрутдинов Ильгизэз.
Кельше калыклы выль урам! Мукет гуртын улӥсьёс но учкыны ветлӥллям ни. Гуртысь автомашинаен ветлӥсьёслы но, вузкарись ужбергатӥсьёслы но табере каньыл луиз, шир-р гинэ кошко урамтӥ. Йӧл люкась Ильдармы уката шумпотэ: оп! шуытозь гурт пумысен мукет пуме вуэ. Выльысь но выльысь пумтэм тау кариськом районысь кивалтӥсьёслы, сюрес лэсьтон-тупатъян ужын вань тыршисьёслы!
Газет лыдӟись куд-ог эшъёсмылэн Карек-Серма гурт сярысь тодэмзы но потоз, соин вакчияк гуртмы сярысь мадё. Вуж Турья гуртысь кӧня ке семья 1750 аръёсы та интые кӧчыса лыктэ. Котырак нюлэс луэмысь, гуртсэс Нюлэс Починка шуо, но Турьяысь потэм бере, котырысь удмуртъёс Турья Починка нимало, артэ улӥсь бигеръёс - Выль Турья (Яна Торжа). Берлогес Карык-Серма ним ляко. «Карык серма» чуваш кылысен «куака шур» шуэм луэ. Зэмзэ но, тулыс пи поттыны трос куакаос люкасько гуртамы. Нош малы чуваш кыл? Гурт ниммы чуваш кыл луэм сярысь тодэм бере, кылем даурлэн 80-тӥ аръёсаз бускель бабайлы Гавриил Чумаковлы вазиськи. Музъем мертась чуваш вылэм, дыр, шуыса валэктӥз со.
Гуртлэн самой бадӟым дырыз 60-лэсь трос корка вал, улӥсез - 400 мында. Нош али 27 юртын 110 улӥсез.
Гурт калыкмы вашкала дырысен ужась луэм. Со сярысь верало архивысь пӧртэм документъёс. Кылсярысь, 19-тӥ даурлэн пумаз калыклэн улэмез «зажиточная» гожтэмын. 32 кузёлыкын 210 адями улэм, вордӥллям 58 йыр вал, 26 скал, 186 ыж но каза. Асвыжые Петыр агай Павлов шуылоз вал: «Нимаз улон дыръя, ноку сютэм ӧм улэ».
Гужем аран дыре 1892 арын Карык-Серма копак ӝуаса быре. Но калык вордскем музъем вылысьтыз уг кошкы, гуртсэс дэмен вакчи дыр куспын ӝуто. Вуж коркаосъя учкыса, вераны луэ, тылпу бере лэсьтэм ваньмыз выль коркаос улыно-вылыноесь, 6х8 быдӟалаен пуктылэмын, улӥез - изэн, вылӥез - корен.
Туала карек-сермаос но бабай-песяйёссылэсь ымнырзэс уг саптало. Берло кызь аръёсы 14 выль корка вуттэмын, 10-эз паськытатэмын. Тыршыса ужало пӧртэм-пӧртэм интыосын. «Бурнак» ООО-лэн кивалтӥсез Р.Назипов ӝутскем мылкыдын вера Н.Константинов, Н.Асаков, В.Якимов, А.Игнатьев, Н.Рогожин, Н.Копаров, Л.Шестаков трактористъёс, шофёръёс сярысь. Бере уг кылё пудо сюдӥсьёс Н.Камаева, Л.Иванова, И.Дмитриева, И. но Ю.Матвеевъёс, М.Петрова, кивалтӥсьсы А.Петрова.
Гуртоос трос пудо вордо. Солы бадӟым юрттэт сётэ турынэн, куроен, ю тысен ООО «Бурнак». Кӧс аръёсы но палэнысь вайыса вузаллязы. Соин ик пудолэн лыдыз но ӧз кулэсмы. Али гуртын 33 скал-ветыл, гидъёсын кӧня кунян, ош, парсь - асьсэос гинэ тодо. Со сяна, 8 кузёлык муш вордэ. «Гуртады гужем нуналъёсы 400 килограммлэсь трос йӧл люкаське», - шуэ йӧл люкась И.Гафиуллин. Гуртын улӥсьёслэн 29 пӧртэм маркаё автомашинаоссы, 7 тракторъёссы, кӧня ке мотоблокъёссы вань. Гуртамы ужа ФАП, библиотека, клуб, магазин. Жаль, пиналъёслэн кулэсмеменызы школаез ворсаны тупаз. Пиналъёс ке луизы, коть туэ ик усьты но дышетыны кутскы. 1965 арын кирпичлэсь лэсьтэм кык комнатаен, паськыт коридорен, котельноен школа юрт куд-ог гуртын улӥсьёслэн вӧтазы гинэ. Шумпотымон соиз, гуртысьтымы пиналъёс начальной школаын государстволы «дуно усизы» ке но, выпускникъёсмы ваньмыз сямен вузъёсы дышетскыны пыро. Районысьтымы дышетон ужъюртъёсын гинэ но дас вить дышетӥсьёс но воспитательёс Карек-Серма школаез йылпумъямъёс. Син медаз усьы: выпускникъёсмы пӧлын законъёсты тӥясьёс но ӧвӧл кадь. Гурт калыкмылэн сабырлыко, тыршись луэмез сярысь ӟеч тодэ ваёнъёсынызы уло районысьтымы дано адямиос - азьвыл участковоймы Наиль Гайнанов, колхоз председательёсмы Дамир Габдрахманов, Равиль Закиров, сельсовет председательёсмы А.Михайлов, Р.Хадиев но.
Тани Быдӟым Семык но Сабантуй праздникъёсы бертозы палэнысь ӵыжы-выжыосмы. Капчи мылкыдын пырозы соос вордскем гуртазы выль ӝутэм урамтӥ. Пушсы тырмоз шумпотонэн! Куд-ог аръёсы машинаосын бертыса но гуртэ пыратэк но кошкылӥзы ук. Праздникъёс азьын районмылэн таӵе бадӟым кузьымезлы куноос но данъяськыса тау каремзэс вералозы.
Гурт калыкмылэн нимыныз сюлмысь ӟечкыласько вуоно праздникъёсын, сӥзисько ваньдылы юн тазалык, семьяосады тупаса улон, ужады азинсконъёс! Котькуд гуртын мед луозы ӟечлыко урамъёс!

Реклама

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.

Иң мөһим һәм кызыклы язмаларны Татмедиа Telegram-каналында укыгыз


Теги: 250
Нравится
Поделиться:
Реклама
Комментарии (0)
Осталось символов: