Ческыт мед кошкоз!

Мильым пыжыны ыльнянез дасян понна 2 стакан йӧлэн 2 курегпузэз шукконо, отчы ватсано 1 пичи пуньы сылал, 2,5-3 стакан чабей пызь, 100 мл кӧс вӧй. Пыр-поч сурано. Пыжоно векчи куарнянь. Собере кулэ луоз пушкес. Сое дасян понна кулэ 500 грамм пӧзьтэм курег но курка сӥль. Озьы ик пӧзьтоно 3 курегпуз. Сӥлез но 100 г вож сугонэз векчи гинэ юдоно, пӧзьтэм курегпузъёсты вилкаен паньыръяно, 150 г сырез векчи вуштон пыр поттоно, 2 пинь кумызез паньыртоно но ваньзэ сурано майонезэн.

2 курегпуз, 600 мл йӧл, 200 мл ву, 500 г пызь, 2-3 бадӟым пуньы сакыр песок, сылал, пыжон понна скал вӧй.

Пызез чепыльтэт сылалэн сураса пужноно. Бадӟым тусьтыын курегпузэз сакырен сураса, шукы луытозь миксерен шукконо. Со сурет пӧлы ватсано йӧл но пызь, эшшо шукконо. Ыльнянез пуньыен сураса, каллен гинэ ву ватсано. Ыльнянь туж кизер но, нап но луыны кулэ ӧвӧл. Кизер луиз ке, мильым кесяськись луэ. Чугун яке нимысьтыз мильым пыжон табаын скал вӧез (одӥг мильымлы 1/2 пичи пуньы) шунтоно (кӧс вӧй но яра) но пыжыны кутсконо.

Таӵе мильымез сиыны луэ йӧлвылэн, чечыен, вареньеен яке сакыр пудраен пызьнаса.

Пыжомы славян мильым. Со понна 4 стакан пызез сурано 1 стакан йӧлвылэн, шӧмызъя сылал пызьнано. Сурано нимаз 10 курегпузлэсь ӵужзэ но тӧдьызэ, шукы луытозь шукконо, собере ваньзэ ӵош сурано. Табаез вӧен малляно но пыжоно огшоры мильымез кадь ик.

Фото: http://kulinar.org/smotret-recept-blinov-na-anglijskom-yazyke.html