Дырен ӵош вамышъяло Праздник в Ципьинском детском саду

Ар гинэ ортчиз ай Ципьяысь нылпи садэз уже кутэмзылы. Пӧртэм но трос ужрадъёс татын ортчытэмын ни. Озьыен, вераны луэ, будӥсь пиналъёслы ӟеч воспитание сёто шуыса.

Садлэн коллективаз тодӥсь но валась, пиналъёслы мур визьнод сётыны быгатӥсь адямиос ужало. Соин кивалтэ одӥгез визьмо, ас ужзэ яратӥсь кышномурт - Никитина Ирина Валентиновна.

- Котьма шуид ке но, адямиен ужаны капчи ӧвӧл. Мазэ веранэз, мылкыд куашкан дыръёс но, шумпотон минутъёс но луыло - ваньмызлы чидано. Нылпи садэ сюлэсь трос нылпиос ветло, малпаськон кылдэ, кызьы ваньмызлы матын, шуныт кыл шедьтоно. Соин ик воспитательёслэн ужзы туж секыт шуыса мон лыдъясько, - шуэ Ирина Валентиновна.

Спортивной ужрадъёслы татын туж трос дыр висъяло. Ёросын ортчись соревнованиосы но соос пыриськытэк уг кылё. Одӥгаз сыӵе ужрадын подготовительной группае ветлӥсь пиналъёс дипломен пусйиськизы, 3-тӥ инты вайыса бертӥзы. «Талы ми зэм ик шумпотӥськом, - шуо коллективын. - Туала вакытлы тупаса, дырен ӵош вамыштӥськом». Спортъя ужъёсын кивалтэ каньыл мылкыдо, котьма ласянь валась егит пи Щербаков Дмитрий. Со милям звукорежиссёрмы но, крезьгур дасян паласен но со сьӧры вуисез ӧвӧл, микшерной пульт но соин валтӥське.

Кемалась ӧвӧл ортчиз анайёслы сӥзем концерт. Туж усто дасяськиллям пиналъёс. Пӧртэм шудонъёсын, кылбуръёсын, кырӟанъёсын шумпоттӥзы люкаськем калыкез. Эсьма, покчи группаысь пиналъёс но быгатыса эктӥзы, анайёслэсь мылкыдзэс ӝутӥзы. «Мудорвай» конкурсын эктонъя кыкетӥ инты басьтэм пиналъёс, быгатонлыксэс возьматыса, сцена вылын тузон поттӥзы. Дусяен Даша но туж тузи кырӟазы, куараоссы жингрес чузъяськыса мемиослэн сюлэмъёсазы бурмыса кылизы. Быгатонзы оскымон, азьлапалэзлы Инмар тазалык мед сётоз соослы, ваньмыз пӧрмоз шуыса оскисько.

Крезьгур, эктон, огъя вераса, лулчеберет ужрадъёсын татын кивалтэ Тарасова Лариса Николаевна - ёросысь одӥгез тодмо кырӟась (сыӵеен тодӥсько мон сое). Лариса Николаевна ас уж бордаз ке кутске, со сое валаса, йӧн-йӧн быдэстыны тырше, будӥсь поколенилы зэмос наставник луэ. Таланто пиналъёсыз но туж ӝог бырйыны быгатэ со. Син медаз усьы сыӵе етӥз, синмаськымон муртлы. Пиналъёсты гинэ ӧвӧл, бадӟымъёсты но ас ужаз кыскыны быгатэ. Таяз празднике но сцена вылэ султӥзы Шайхутдинов Кафиль, Муртазина Рания, ачиз но палэнэ ӧз кыльы, анай-атайёс пӧлысь шуыса монэ но чортӥзы. Куризы бере, пумитъяськыны ӧй быгаты, одӥгзэ гожтэм кырӟанме быдэстӥ. Синтезаторен Кафильмы шудӥз. Котьма ласянь быгатӥсь пияш со: сцена вылын усто кырӟась, аслаз ужаз зэмос мастер (сантехник), музыкант бадӟым букваен шуысал мон сое, пианиноен, арганэн шудонын со сьӧры вуисез ӧвӧл, дыр, шуыса малпасько. Сыӵе тунсыко концертлы люкаськем калык тау кариз, котькуд артистэз кужмо кичабонъёсын пумитаз но келяз.