Дышетскисьёсыз ньыль кылын вераськем школалэн директорез.

- Пӧртэм кылъёсты тодыны туж кулэ шуыса, дышетскисьёслы ялан вераськомы, та зэмзэ ик озьы-а?- шуыса нырысетӥ юанэным вазиськи.

- Та улонын пӧртэм нациысь адямиосын ӵемысь вераськиськомы. Саклык висъямды вань-а, ас кылыныд ӟечъяськид гинэ ке но, вазиськем адямиен вераськыны каньылгес. Та учыре тон та муртлы гажамдэ возьматӥськод, озьыен, со но тыныд юрттыны дась. Анаен атае Ципья музъемысь, соос улонлэсь туж секыт вакытъёссэ шаерен ӵош асьсэ вылазы ӝутӥзы. Атайлэн киыз пичи дыръяз сӧсырмемысьтыз, оже ӧз басьтэ. Жугиськон дыръя Ципьяын колхозэн кивалтэ. Собере, фронтэ мыныны ӧй ке но быгаты, пайдае тросгес луоз шуыса, Казаньысь порох лэсьтон военной заводын ужа. Жугиськон дугдэм бере, та колхозын анаен ӵош ужазы, 6 нылпи будэтӥзы. Туннэ нуналлы ми ваньмы но сӧл-тазаесь, солы шумпотӥсько,- шуэ Василий Фёдорович.

Семьяяз кыкетӥ нылпи луыса будэм пиез улон вордскем гуртэныз герӟам. Со дырысь Ципья шор ёзо школалэн директорез Ягфар Яппаров шор ёзо тодон-валан басьтэм пилэсь Казаньысь гурт хозяйствоя институтлэн механикая отделенияз дышетскыны пыремзэ чик но умоен уг лыдъя. «Тыныд математикая дышетӥсь луыны кулэ, тынад азьпалыд школа» шуыса, выльысь вань документъёссэ Казаньысь педагогикая институтэ сётытэ. Армилэн радъёсаз кошкытозяз Ципьяысь школаын лаборант луыса ужаны но вутске со. 3 ар служить каремез бере, выльысь школае лыктэ, ини математикая дышетӥсь луыса урокъёс сётэ Василий Фёдорович. Бадӟым опытэн наставникъёсыз трос луо соку та школаын. Пиосмурт дышетӥсьёслэн ваньзы но шуымон тылэз-вуэз потэм ожысь ветеранъёс. Шара урокъёсын, пӧртэм собраниосын тросэзлы дышетске со соослэсь. 3-тӥ классысен ӵош дышетскем, ачиз кадь ик математикаен дышетӥсен, чеберлыкезлы тросэз синмаськем Роза Харисовнаен семья кылдыто. Тани 47 ар ини шумпотонын но, шуг-секытъёсын но ӵош соос. Нылзы Набережные Челныын, врачъёслэн семьязы луыса, 2 нылпи будэто. Пизы семьяеныз озьы ик врачъёс. Балтасьысь центральной больницаын ӵош ужало, 3 нылпи будэто.

- Табере соослэсь бертэмзэс витиськом, асьсэос ӧз ке бертэ, асьмеос мынӥськом,- шуэ ветеран. Бен, та юртысь сотэк но адями уг быры: дышетӥсьсылы, кивалтӥсьсылы тау карон мылкыдзэс вуттыны но, секыт минутъёсы кенеш курыса лыктӥсьёс но, шумпотонэнызы вошъяськисьёс но трос.

Ципья школаын воспитательной ужъёсъя завуч луыса ужакуз, «Труд» хозяйстволэн партийной организациеныз кивалтыны шуэм указание басьтэ Василий Фёдорович. Мынӥсько, уг мынӥськы шуэм кыл уг луы соку. Партилэн косэмезъя, 1989-тӥ арын школалы директоре тодмояло. Соку Быдӟым Отечественной ожысь ветеран, школалэн директорез Гарифзян Галиев дано шутэтсконэ потэмез бере, ачиз кылдытэм музеен кивалтыны кутске. Соку пу эстонысен эгыре выжемысь (школаын пуэн 39 гур эстоно луэ) ужъёс умой пала кошко шуэм егит директорлэн шумпотонэз кемалы уг мыны, 2 этажо корен лэсьтэм юрт дышетскыны ярантэм югдуре вуэ, дышетскисьёс сотэк но кык сменаен дышетско. Юрттэт курыса мынэмез бере, райкомлэн нырысетӥ секретарез Марат Ахметов юрттэ: «Мылкыдыд луиз ке, ужез кутскы, уксёзэ ачим шедьто». Районлэн бюджетысьтыз лэсьтӥськонэз кутскон понна 10 сюрс манет уксё висъяське, бускель Марий Эл Республикаысь Мари-Турек районысь ПМК ужаны кутске. Кӧня ке пол уж дугдэ, 5-10 сюрс уксё висъяськыса нош ик кутско. Тулыс Арчаын районъёсысен лыктэм представительёслэн быръёнъёс азьысь собраниязы та ужпумез ӝутэ, одӥг арняскын республикаысен Минтимер Шаймиевлэн кинюртэм гожтэтэз вуэ: лэсьтӥськонэз кутсконо, 1-тӥ сентябрьлы школаез вуттоно. Уже Вазих Галиев кивалтэм Балтасьысь межхозяйственной лэсьтӥськонъя организациысь лэсьтӥськисьёс басьтӥсько. Президент 1-тӥ сентябре ачиз лыктыса усьтэ та школаез. Таосыз вераку Василий Трофимовлэн ымнырыз ӵыжектыса, синъёсыз пиштыса кошко. Сюлэм шунытсэ сётыса, тыршыса лэсьтэм школаез ук та. Туннэ Ципья школалэн коллективез солэсь ужзэ азинтэ. Пӧртэм конкурсъёсын вормисьёс луэм, предметъя олимпиадаосын призо интыос басьтэм дышетскисьёслэн азинсконъёссылы шумпотыса улэ ветеран. Трос кужым поныса, анай-атайёсты вордскем кылэз дышетыны кулэ луэмзэ оскытыса ветлэм дыръёсызлэн бервылыз табере адске: дышетскисьёс пор но удмурт кылъёсъя Татарстанын гинэ ӧвӧл, бускель республикаосын ортчись олимпиадаосын но ялан вормисьёслэн радазы.

Огъя государственной экзаменъёс, дышетӥсьёслэн асьсэлы требовательной луэмзы, кивалтӥсьлэн секретъёсыз сярысь кема вераськимы соин. Дышетскисьёслэн школаын ӟуч, бигер, удмурт, пор кылъёсын вераськемзы, англи но немец кылъёсты дышетон республика понна гинэ ӧвӧл, Россия масштабын уникальной маке луиз ке но, ӧм вылтӥяське, шуэ со. Та нуналъёсы 70 аръем юбилееныз ӟечкылам ӵош ужам эшъёсызлы, дышетскисьёсызлы, кивалтӥсьёслы тау каремзэ вуттӥз. Ми но та мылкыд каронъёсы пыриськыса, улонзэ нылпиослы визьноданлы но тодон-валан сётонлы сӥзем районысь удмурт калыклэн гажамон адямиезлы, трос лыдъем Данъян грамотаосын пусйиськем, «РСФСР-ысь дышетон удысысь отличник», «Татарстанысь сӥё-дано дышетӥсь» нимез данэн нуллэм Василий Фёдорович Трофимовлы, дышетонысь ветеранэн, улонысь эшеныз Роза Харисовнаен тупаса, таза луыса улыны мылкыд кариськом.