Хезмәт

Ӟеч лу, школа

Дышетскон котькинлы выль сюрес усьтэ. (Кузебай Герд)

«Жин-жин жингыртӥз гырлы - ӟеч лу, школамы» - та кырӟан кылъёсын йылпумъязы Шор Кушкет школаысь 11-тӥ классын дышетскись пиналъёс Берпуметӥ гырлы куара праздниксэс.
Аръёс бызись ву выллем ортчо. Ми али гинэ шумпотыса ветлӥм школае, мылысь-кыдысь дышетским парта сьӧрын, синмез-пелез усьтыса кылзылӥм яратоно дышетӥсьёсмес. Толон гинэ вал кадь, ми нырысетӥ классэ тодон-валан басьтыны пырим: Вуж Кушкет но Шор Кушкет гуртъёсысь - 3, Кисальысь но Вуж Турьяысь - 6, Пор.Кутешысь - 2 ӵошен. Асьсэлэн бурд улазы милемыз басьтӥзы нырысетӥ дышетӥсьёсмы, кудъёсыз улонэ нырысетӥ вамыш лэсьтыны юрттӥзы. Соосын ӵош ми урокысь уроке букваосты дышетским, асьсэос кадь ик визьмо адямиосын тодматским.
Нош классысь классэ выжыса, ми визьмогес луим, улонлэсь пуштроссэ мургес валаны кутским. Бадӟым будэмъя озьы ик воштӥськизы дышетӥсьёс но. Сизьым ар ӵоже милемын артэ вамышъязы самой визьмо, бадӟым сюлэмо, капчи мылкыдо Шор Кушкет школаысь дышетӥсьёс. Со аръёс ӵоже ми соосын матысь эшъёс кадь луимы, соослэсь визьнод но кенеш басьтыса, бадӟым улонэ юн вамыш лэсьтыны дась луимы. Дышетӥсьёсын ӵош ми шуг-секытъёсты но, вормонъёсты но валче люким. Одӥг бадӟым семьяын кадь ог-огместы яратыса, гажаса улӥмы. Вань вал керетон но споръяськон дыръёсмы, нош кызьы соостэк улыны дышетскод?
Милемлы котьку азьлань вамышъяны юрттӥз милям классной «анаймы» - Николаева Мария Петровна. Витетӥ классысен со, милемлы сюлэмзэ сётыса, зэмос адями луыны дышетӥз. Со школаын трос аръёс ужа ини, соин ик Мария Петровна котькудмылэн сюлэмъёсамы сюрес шедьтыны, ми пушкысь борӟам ӧсъёсыз усьтыны быгатӥз! Солэн кивалтэменыз ми куинь пол «Арлэн классэз», одӥг пол «Арлэн самой активной классэз» луимы. Та милемлы туж бадӟым шумпотон вал! Юлтошъёсынымы ми котьку огкылысь дышетскимы, котьку азьпала мыныны тыршимы. Пӧртэм конкурсъёсы но, олимпиадаосы но, спортивной ӵошатсконъёсы но пыриськылӥмы. Одно ик нырысетӥ интыосты басьтӥськомы вал. Одӥгез милям самой бадӟым вормонмы - Казаньын ортчем «Ватан» фольклорной конкурсын нырысетӥ инты басьтэммы. Милям «Инвожо» фольклор коллективмылэн кивалтӥсез - Камаев Виктор Павлович. Соин ӵош ми пӧртэм калык кырӟанъёсты но эктонъёсты дышетским, концертъёсы пыриськыса, учкисьёсты паймытыса кельтӥм.
Нош табере ми школаысь 17 ӵошен кошкиськом ини (куинез 9 классэз йылпумъям беразы кошкизы). 2014-тӥ арысь выпускникъёслэн нимынызы вань дышетӥсьёсмылы тау вераме, кузь гумыр, шулдыр улон, капчи мылкыд, ужазы выль азинсконъёс сӥземе потэ. Визьмоесь дышетскисьёс тӥледлы, яратоно дышетӥсьёсмы. Нош ми азьпалан тыршомы умой, зэмос адями луыса улыны.
Шор Кушкет школаысь выпускникъёслэн нимынызы - Юлия Ильмурзина.

Теги: 250
Нравится
Поделиться:
Реклама
Комментарии (0)
Осталось символов: