Ёросысьтымы тужгес арлыдо муртлы 105 арес тырмиз (+фото)

Таӵе бадӟым лыдпусэ вуэменыз Ольга Васильевнаез Балтась районлэн главаез Рамиль Нутфуллин, социальной дурбасьтонъя отделлэн кивалтӥсез Алсу Гатиятуллина, Шубан гурт поселенилэн главаез Раиф Музипов ӟечкылазы, шунытэсь мылкыд каронъёссэс вуттӥзы но кузьымъёсын шумпоттӥзы. 
Ортчем даурлэн кутсконаз, 1914-тӥ арын, вордскем песянайлы чик но 105 арес уд сёты. Син медаз усьы, со ас арлыдэзлэсь трослы егит адске. Валамон, та меӵак песянаез утисьёслэн тыршеменызы герӟаське. Лариса племянницаез ӵужапайзэ но, Ольга Васильевнаез, анайзэ но, Мария Алексеевнаез, сюлмысь гажаса уте, котыразы шуныт атмосфера, каньыллыкъёс кылдытэ. Та понна песянайёс солы пумтэм тау каро. 
Синъёсыз уг ке но адӟо ни Ольга апайлэн, со ваньзэ кылэ, вераське, та гинэ но ӧвӧл, кырӟа но али – удмурт сямен но, бигерен но (сузэреныз Мария Алексеевна Степановаен валче балалайка шудэмъя кырӟаз но). «Ачиз но кырӟанъёс малпа», - шуэ Лариса Валентиновна. 
Куноослэн лыктэмзылы но Ольга Васильевна шумпотӥз, вылысьтыз вылаз «доброго здоровья, спасибо» шуыса тау кариз. Ёросысь вуэм кивалтӥсьёс но асьсэлэсь паймемзэс-синмаськемзэс ӧз ватэ. «Кинлы ке верад ке, уз оске», - шуиз Алсу Фаризовна, песянайлэсь сыӵе бадӟым арлыдын луэмзэ валаса. «Молодец, Ольга апай! Кылдэм ке, 110 арес тырмонад но вуомы ай», - шуиз Рамиль Рашитович но, синмаськемзэ возьматыса. 
Ма сӥзёд на та одӥг даурлэсь кема улэм песянайлы – конечно, тазалык. Тазалык но каньыллык! Солэсь но бадӟым мылкыд карон ӧвӧл, дыр.