Хезмәт

Балтач районы

18+
2024 - Гаилә елы
Азьлане

Газетлэн нырысетӥ редакторез

Туэ январь толэзьлэн кутсконаз 80 ар тырмиз удмурт кылын потӥсь «Азьлане» газетлы. 1962-тӥ арозь (Балтась район Арск районэн огазеяськытозь) «Азьлане» нимаз газет вал. Нош 1962-тӥ арысен бигер район газетлэн удмурт кылэ берыктэм газетэз луэ. Татарстанын 80 ар ӵоже удмурт кылын потӥсь одӥг гинэ газетлэн кутсконаз кинъёс сылӥллям, сое кылдытонэ но...

Тодэммыя, Балтась район 1930-тӥ арын кылдэ. 1931-тӥ арозь районлэн центрез Тюнтерын луэ. Район центр Тюнтерын луыку, калыкез дышетонъя отделлы старшой инспекторе Николай Сергеевич Чакминэз тодмояло. †апак тӥни со аръёсы Николай Сергеевич партилэн райкомезлэн бюроезлэн заседаниосаз районын удмурт кылын газет поттон сярысь ужпумез ӝутылэ.
Николай Сергеевич Чакмин вордске 1905-тӥ арын Вуж Кушкет гуртын. Куинь аресэн анайтэк кыле, нош атаез но сюранаез Николайлы со дырлы тупась тодон-валан сётыны быгато. Школаез йылпумъяса кӧня ке ужамез бере, Можгаысь педтехникуме дышетскыны пыре. Татын дышетскыкуз, Николай Чакмин матысен тодматске Григорий Медведевен, Михаил Коноваловен, Пётр Бурбуровен. 1926-тӥ арын Николай Чакмин педтехникумез йылпумъя, со арын ик Ципьяысь крестьян егитъёслэн школаязы (ШКМ) ужаны кутске. Соин ӵош та школаын ужаны кутско Иван Степанов (Ср.Кушкет), Игорь Иванов (Сала Кушкет) но Пётр Афанасьев (Тылогурт). Та коллективын ик ужазы удмурт революционерлэн Максим Прокопьевлэн кышноез Евгения Васильевна Прокопьева, соослэн нылзы Людмила но пизы Геннадий. Тӥни сыӵе коллективын мытэ аслэсьтыз ужан сюрессэ Николай Сергеевич.
Район центр Балтасе выжем бере, партилэн райкомез удмуртъёс пӧлысь кивалтӥсь кадръёс бырйыны кутске. Райкомлэн инструкторъёсыз луыса ужаны кутско И.Демеева но А.Чегаев, Н.Чакмин - РОНО-ын, ВЛКСМ-лэн райкомаз - Г.Халтурин. «Азьлане» газетэз поттыны кутскон азьын, Николай Сергеевич кӧня ке дыр ӵоже ужа Татарстанысь калыкез дышетонъя министерствоын (азьвыл Наркомпрос).
1933-тӥ арын 20-тӥ декабре ВКП(б)-лэн Балтась райкомез районын удмурт газет поттон сярысь постановление кутэ. Солы редакторе тодмояло Н.С.Чакминэз, кылкутӥсь секретаре - Г.Халтуринэз. «Азьлане» газетлэн нырысетӥ номерез потэ 1-12 январь (шонер числоез тодмо ӧвӧл) нуналъёсы. Вылӥын верам та кык эшъёс селькоръёслэсь выступлениоссэс дасяло. Нош ачиз Николай Сергеевич отчы бадӟым статья гожтэ, отын со пыр-поч валэктэ газет азьын сылӥсь ужпумъёсты.
Удмурт шрифтъёс тырмыт луымтэысь, газет поттонын бадӟымесь шуг-секытъёс кылдӥллям. Нырысьгес букваосты бигер наборщицаос бичаллям, берлогес Ушмаысь, Лӧзялась удмурт кадръёсты ӧтиллям. Н.Чакмин но Г.Халтурин котькуд удмурт гуртын сямен селькоръёс мед луозы шуыса тыршиллям. Тужгес но активной селькоръёс луиллям Вуж Кушкетысь Иван Капралов но Василий Чакмин (Чакма Вася), Карык-Сермаысь Никитин, Тагашурысь Эшкеев, Кургемысь Иван но Григорий Халтуринъёс. Озьы ик гожъяллям Кукмор районысь селькоръёс но.
«Азьлане» газетэз поттонын тыршем сяна, Николай Сергеевич бадӟым общественной уж но нуэ, удмурт писательёсын юн кусып возе, соос пӧлын Г.Медведевен но. Огшоры нуналъёсы газет поттонын тыршиз ке, шутэтскон нуналъёсы гуртъёсы сюрес кутылӥз, селькоръёсын пумиськылӥз, ӟуч но бигер кылын гожтэмъёсты удмурт кылэ берыктылӥз, «Советской Удмуртия» газетэ статьяос гожъяз. Коллективизация аръёсы калык пӧлын валэктон уж нуонлы но уно дырзэ висъяз со. Ини та событиос сярысь книга но гожтыны малпанъёсыз луэм, гожтыны но кутскем. Сталинэз мултэс данъян аръёс кутскем бере, вуоно книгаезлэн рукописьёсыз ӧвӧллы потӥллям. Ачиз кытчы ке но ватэм, дыр.
1937-тӥ арын республикаын потӥсь «Кызыл Татарстан» газетэ, асьме районын потӥсь «Югары унышка» газетлэсь ужзэ курласа, бадӟым статья гожто. Отын газетлэсь редакторзэ Рахим Хурматуллинэз пӧртэм ласянь курлало, янгыше уськыто. Кылсярысь, газетын зэмлыклы тупасьтэм иворъёс вӧлмытӥсько, ӝожтӥськыса гожтэм гожтэтъёс уг эскерисько, редакция райкомен ӵош рейдъёс уг ортчытъя, газетын печатласькем критической статьяослы ответ уг сётӥськы, пе. Тӥни со статья потэм бере, эскерон ужъёс кутско. Валамон ини, бигер газетлэн редакторезлэсь ужзэ эскерон дыръя «Азьлане» газетлэсь ужамзэ но эскеро. Та эскерон уж быдэс ар мында кыстӥське. Вылӥын верамъёс сяна, Р.Хурматуллинлы но Н.Чакминлы уно пӧртэм мукет янгышъёсты но «ляко». Николай Чакминэз Удмуртиысь писательёслы уксёен юрттэмез, соосын кусып воземез понна янгыше уськыто. Тодэммыя, удмурт писательёсты «финн шпионъёсын» кусып воземзы понна янгыше уськытӥзы.
Тӥни со эскеронъёс бере Николай Чакминэз партилэн радъёсысьтыз потто (1937-тӥ арын ноябрь толэзе). Сое УК-лэн 58-тӥ статьяезлэн 7-тӥ пунктэзъя янгыше уськыто, берлогес та статьяез 109-тӥ статьялы вошто но 1938-тӥ арын вить арлы эриклэсь люко. Николай Чакминлэн кузпалэз Екатерина Алексеевна Садакова (выжыезъя Ципьяысь) берлозэ соин 1939-тӥ арын сентябрь толэзе Казаньысь Вахитов тюрьмаын пумиське. Соку Николай Сергеевич секыт висем ини, пумиськон но тюрьмалэн лазаретаз ортчем. 1939-тӥ арлэн пумаз Николай Сергеевич отын ик кулэм.
Тӥни озьы кысӥз районамы потыны кутскем удмурт газетлэн нырысетӥ редакторезлэн Николай Сергеевич Чакминлэн улонэз. Нош соку солы ваньзэ-ӧвӧлзэ 34 арес гинэ луэм. Улонэзлэн самой сяськаян дырыз, творческой ужъёсаз бадӟым малпанъёсын улон дырыз. Москваысь журналистъёслэн институтазы дышетскыны пырыны но вутскем вылэм ини со, районысь удмуртъёс сярысь книга гожтон малпанэн улэм.
Кызь ар ёрос дыр ортчыса, Н.С.Чакмин шонере поттӥське.
Гажано «Азьлане» газетэз лыдӟисьёс, туннэ тӥ киосады возиськоды районысь удмурт калыклэн дано пиеныз Николай Сергеевич Чакминэн но солэн эшъёсыныз 80 ар талэсь азьло кылдытэм удмурт газетлэсь очередной номерзэ. Та газет тодады вайытоз солэсь нырысетӥ редакторзэ но ӵош ужам эшъёссэ.
Редакцилэсь: та ортчем 80 ар ӵоже газетлэн редакцияз уно гинэ адямиос ужаллям, дыр. Кин ке но редакциын, кин ке но типографиын. Уноез понна та история ини. Та историез азинтон вылысь, ми куриськом тӥледыз вазиськыны, асьтэлэсь ужам аръёстэс тодады вайыны но редакциен кусып герӟаны. Гожтэлэ милемлы асьтэлэсь тодэ ваёнъёстэс.

Следите за самым важным и интересным в Telegram-каналеТатмедиа

 

Без социаль челтәрләрдә:  ВКонтакте, ВКонтакте, ТикТок, Ютуб, Одноклассники, Телеграм, Яндекс.Дзен

 

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.


Оставляйте реакции

1

0

0

0

0

К сожалению, реакцию можно поставить не более одного раза :(
Мы работаем над улучшением нашего сервиса

Нет комментариев

Теги: 250