Хезмәт

Балтач районы

18+
2024 - Гаилә елы
Азьлане

Газетмы туэ 85 аръем юбилейзэ пусъе

85 ар — туж ик трос ӧвӧл ке но, газет понна со быдэс улон. 85 ар куспын «Азьланеын» трос воштӥськонъёс луиллям — газетлэн форматэз, солэн кӧня пол арняяз потэмез, коллективез но кӧня пол выльдӥськиз... Но одӥгез гинэ уг воштӥськы — татын котьку сямен ужаллям асьсэлэсь ужзэс яратӥсь, сое валаса быдэстӥсь муртъёс. Одӥгез соос пӧлысь луэ Клавдия Ивановна Кидалашева.

Улон сюресэз

Кидалашева (Павлова) Клавдия Ивановна 1953-тӥ арын Вуж Кушкет гуртын вордске. Гуртысьтыз 4 классъем покчиёзо школаез йылпумъяса, 5-8-тӥ классъёсты Ӟаны школаын дышетске, нош 9-10-тӥ классъёсты Ципья школаын йылпумъя. Школаез йылпумъямез бере ик, 1970-тӥ арын, типографие ужаны интыяське. Но отын кема уг ужа — 1974-тӥ арын Ижевске улыны кошке. Одӥг ар ортчыса, 1975-тӥ арын, Киров улосысь Белохолуницкой ёросысь Подрезчиха посёлоке картлы кошке. Кузпалэныз соослэн кык пиоссы вордско — Алексей но Владимир. Туннэ нуналэ кыкназы ик асьсэ семьяосынызы Кировын уло. Нырысетӥ кузпалыз, жаляса верано, кулэ. 2007-тӥ арын, атаез кулэмен, Клавдия Ивановна выльысь вордскем гуртаз, Вуж Кушкетэ, бертэ. Татын со выльысь картлы кошке, но кыкетӥ кузпалэныз но солы кема улыны уг кылды — 2012-тӥ арын пиосмурт кулэ. Туннэ нуналэ но нылкышно Вуж Кушкет гуртын улэ. Гуртоосыз сое ярато но гажало, котьма ласянь юртто.

Клавдия Ивановналэн атаез, Павлов Иван Константинович, дышетӥсь луыса ужам. Кытын гинэ со дышетымтэ — Вуж Кушкетын но, Гондыргуртын но, Сизнерын но, Сырьяын но, Вукогуртын но, Ӟаныын но. Пенсие потэм бераз колхозын но тыршем. «Азьлане» газетэ со ялан статьяос гожъяллям. Адямиос солэсь гожъямъёссэ яратыса, пе, лыдӟиллям.

Ужам аръёссэ тодаз вайыса...

Типографиын Клавдия Ивановна 1970-тӥ арын, школазэ йылпумъямез бере ик, ужаны кутске. Соку район газетлэн валтӥсь редакторезлэн дубляжъя воштӥсез луыса Борисов Николай Григорьевич тыршем. Ужам аръёссэ тодаз вайыса, Клавдия Ивановна вера:

— Типографиын киын бичась наборщица луыса ужай, озьы ик линотипен ужай. Ми редакцилэсь нимаз организация вал ке но, туж шулдыр ужамы. Ваньмы ӵош улӥмы, тани туспуктэме но валче усьылӥмы (лыктытозям ик дасяса понэм туспуктэмъёсыз пӧлысь огзэ басьтыса мыным возьматэ — Н.Ж.). Али кемалась ӧвӧл Александр Сергеевич Петров звонить кариз, мынэсьтым улон-вылонме юалляськыса. Валче ужакумы мон солы «Александр Сергеевич, чуть не Пушкин» гинэ шуыло вал, нош со мыным, озьы ик, шудыса, — «Клавдия Ивановна, чуть не Шульженко» шуыса вералляз. Звонить карыкуз но озьы вазиз. Кыӵе мон шумпотӥ, солэсь куаразэ кылэм бере. Ужан дыръёсы, коллегаосы син азям соку ик пуксизы, — шумпотэ нылкышно.

Ньыль ар, малпад ке, сокем трос но ӧвӧл кадь. Но та ньыль ар куспын гинэ но кӧня адямиосын ужаны тупам Клавдия Ивановналы. Соос пӧлын бигерез но, ӟучез но, удмуртэз но луэм. «Ноку но национальностья адями шоры ӧз учке. Ваньмы шулдыр улӥмы, огкылысь ужъёсты быдэсъямы». Шумпотыса тодаз вайиз со валче ужам эшъёссэ — Пор-Кутешысь Валентина Самсоноваез (со но киын бичась наборщица луыса ужам), со гуртысь ик Людмила Трофимоваез (кулэмын ни). Куиньназы соос нуналлы быдэ Балтасьысь бертыса ветлӥллям, пыдын но ветлыны тупам соослы — соку машинаос трос ӧй вал али. «Ой, Клава, кыӵе жаль потӥськоды», — шуылэм Николай Григорьевич Клавдия Ивановналы. Ма, валамон но — куинь егит нылъёс, гужем пӧсь куазен но, толалтэ кезьыт ӝытъёсы но, кышкатэк бадӟым сюрес вылэ потыса доразы бертылӥллям. Но ӧжыт дыр ортчыса, нылъёс Балтасьын квартираын улыны кутскиллям. Самой шулдыр егит аръёсыз луиллям, дыр, соку Клавдия Ивановналэн...

Берлогес типографие, нылъёслы нош одӥг коллега-юлтош луыса лыктэм ужаны Вера Лобанова. Соин но ӝог огъя кыл шедьтыса, валче ужаны кутскиллям, котьку ог-огзылы юрттӥллям. Ужаллям со аръёсы ик Ушмаысь Зинаида Романова — со корректор, машинистка, наборщица луэм (кулэмын ни), Лӧзяысь Ольга Евдокимова печатница луэм (кулэмын). Ярак-Чурмаысь ужаны ветлэм Алевтина Фомина, Гондыргуртысь (али дыре Кисальын улэ) — Евгения Гайсина, соос кыкназы ик наборщицаос луиллям. Гондыргуртысь Мария Ефремова но ужам, со машинисткалэсь ужъёссэ быдэсъям.

Бадӟым но эшлыко коллективлэн улонэз шулдыр луэм. Соин ик Клавдия Ивановна али но, Балтасе лыктэмезлы быдэ, мӧзмыны кутске типографиын ужам аръёсызлэсь, тодаз вае татын ортчем котькуд нуналзэ. «Яра али туспуктэмъёсы кылемын, соос сюлэмез шунто», — шуэ Клавдия Ивановна.

Следите за самым важным и интересным в Telegram-каналеТатмедиа

 

Без социаль челтәрләрдә:  ВКонтакте, ВКонтакте, ТикТок, Ютуб, Одноклассники, Телеграм, Яндекс.Дзен

 

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.


Оставляйте реакции

2

0

0

0

0

К сожалению, реакцию можно поставить не более одного раза :(
Мы работаем над улучшением нашего сервиса

Нет комментариев

Теги: юбилей