Гажамон песянай

Ксения Ивановна 14 аресысен кутскыса колхозын ужам адями. Тыршыса, ужез яратыса но пыр-поч пумозяз вуттыса быдэсъямез понна сое гажаллям, солэсь адӟем кариллям.

Кузпалэныз Пётр агаен куать нылпи будэтӥллям соос. Но, жаляса верано, одӥг нылпизы туж вазь кулэ... Улонлэсь чеберзэ, ужлэсь шӧмзэ возьматыса-валэктыса будэто кузпалъёс нылпиоссэс. 3 ар талэсь азьло Ксения Ивановналэн кузпалэз югыт дуннеен люкиське. Та кайгуэз арлыдо кышномурт туж секытэн чида. Яра нылпиосыз, матысь муртъёсыз ялан вӧзаз луо, улыны кужым ватсаса уло. Туннэ нуналэ юбиляр Юрий пиеныз, Тоня кенэныз но Стас внукеныз ӵош улэ.

«Таза луыкумы ужамы ини. Инмарлы тау, туннэ нуналэ каньыл, ракат улонын улӥськомы», - шумпотэмзэ уг ваты Ксения Ивановна. Песянаез гажаса юбилееныз валче ӟечкыланы нылпиосыз гинэ ӧвӧл, нунокъёсыз но, соослэн нылпиоссы но люкаськиллям вал. Районысь лыктэм куноосты но туж шуныт пумитаз Ксения Ивановна. Ӟечкыласа кузьым сётэм котькуд муртлы сюлмысен тау кариз. Но, зэмзэ ке верано, туннэ нуналэ таукарон кылъёсты асьмеос солы вераны кулэ. Тау тӥледлы, Ксения Ивановна, милям туннэ каньыл, тынӥсь улэмамы Тӥляд но люкетты бадӟым. Улонды шудэн-бурен пачылмыса, куректон-сюлмаськонъёстэк мед азинтӥськоз.