Геройлы сӥзем нунал

Котькуд дышетскон арын Ӟаны шор ёзо школаын сяме пырем вунонтэм но сюлме пыӵамон ужрадъёс ортчытӥсько. Соос пӧлысь одӥгез тунсыкоез но бадӟымез луэ Россиысь Героез - Олег Николаевич Исаевез - буре ваён но сӥлы карон нунал, кудӥз туэ ортчиз 17 январе. Али, 9 декабре гинэ, быдэс Россиысь Геройёслэсь дано нуналзэс ортчытӥм, кытын сӥлы карыса верамы быдэс Россиысь Геройёсты, кинъёс ас улонзэс жалятэк геройлыко ужъёс лэсьтӥзы но лэсьто.

Школаямы дышетскем Россиысь Геройлэсь нуналзэ ортчытыны куное ӧтемын вал Олеглэн анаез - Вера Петровна но атаез - Николай Степанович, Арча педагогия училищеысь историен дышетӥсь Ильхам Борханович Низаметдинов, Олеген ӵош дышетскем, али Арча ёрослэн спортъя но туризмъя ёзэныз кивалтӥсь Зиннур Вазихович Сагитов, Балтась ёросысь военком Васил Назмутдинович Валиев, Афган оже пыриськем Фарит Ракипович Галимов но Халиль Рифович Исеев, дышетонъя управленилэн кивалтӥсез Алия Юнусовна Закиева, куке но школаямы дышетскем, Афган но Чечня ожъёсы пыриськем запасысь солдатъёс, озьы ик ӵошатсконъёсы пыриськись Ципья, Малые Лызи но Тюнтер шор ёзо школаосысь егит спортсменъёс.

Дышетскись пиналъёс, лыктэм куноос, сюлэмзы ӝож луыса, ортчемзэ тодэ вайыса, тумбочка вылысь Олеглэн портретэз дорын ӝуась буре ваён сюсьтыл шоры учкыса, чус сыло. Россилэн Кункрезез чузъяське, Куншетэз ӝуто Олеглэн атаез - Николай Степанович, Арча педагогия училищеын ӵош дышетскем эшез - Виктор Камаев но Николай Степановичлэн покчи пиезлэн нылыз - 8-тӥ классын дышетскись Диана Исаева.

Афган ож йылпумъяськиз, нош уг кӧло пиоссэс армие келям анайёс, малы ке шуоно отын но татын асьме страналэн картаяз «пӧсь точкаос» кылдо, соос пӧлын кышкыт кыллы пӧрмиз «Чечня». Ӧз кӧлэ Вера Петровна но Николай Степанович пизы Чечня инбамын лобаку.

«Исаев Олег Николаевич вордскиз Вуж Кушкет гуртын 14-тӥ январе 1964-тӥ арын. Олеглы туэ 51 арес тырмысал. Ас гуртаз начальной школаез йылпумъяса, 1975-тӥ арын дышетскыны лыктӥз Ѓаны шор ёзо школае. Школаын со умой дышетскиз. 1979-тӥ арын 8 классэ йылпумъяса дышетскыны пыриз Арча педагогия училищее. Татын дышетскыкуз ассэ со дасяз пӧртэм секыт учыръёсысь потыны, яратӥз куасэн бызьылыны но капчи атлетикаез. Пыриськиз пӧртэм ӵошатсконъёсы. 1983-тӥ арын, педучилищеез умой гинэ йылпумъяса, ужаны кутскиз Иштуган тямыс аръем школаын. Та аре ик сӥзьыл басьтэмын вал армилэн радъёсаз. Куать толэзь служить каре Красноярск-66 карын, 1984-тӥ арын дышетскыны пыре вылӥ тодон-валан сётӥсь Чкалов нимо военно-авиационной училищее. 1988-тӥ арын училищеез йылпумъя но службазэ кутске Азербайджанын, собере сое выжто Германие. Берло аръёссэ луэ Будёновскын. Олег боевой лобанъёс лэсьтэ Афганистанэ, Таджикистанэ но Чечняе. Геройлыко ожмаськемез понна сётэмын вал «За отвагу» медаль, обороная министрлэн нимыныз киын нуллон час. Чечняын асьме сухопутной войскоос шуг-секытэ шедё, соосты мозмытоно! Сыӵе боевой задание сётӥське лётчикъёслы - полковник Свиридовлы но майор Исаевлы. Та заданиез соос быдэсто, нош тушмон пуля самолётэ йӧтэ. Со вал 5-тӥ мае 1996-тӥ арын. Озьы быро кык геройёс. 1996-тӥ арын 26-тӥ июне Россилэн Президентэзлэн 886-тӥ номеро Указэзъя, Олег Николаевич Исаевлы сётэмын Россилэн Героез ним (кулэмез бере) но «Зарни Кизили» медаль», - таӵе кылъёсын кутскиз ужрадэз нуись Геройлы сӥзем нуналэз.

Чузъяське «Что может быть лучше России» кырӟан. Бен, ӧвӧл, дыр, асьме шаерлэсь чеберез но дуноез, сое утён понна ӧз жаля Олег аслэсьтыз улонзэ. Мемориальной пул доры сяська поныны кыл сётӥське вынызлэн нылызлы Диана Исаевалы но сузэрезлэн пиезлы Денис Петровлы.

Собере кыл сёто Олеглэн атаезлы. Со тодаз вайыса вера Олеглэн пичи дырыз, солэсь пичиысен ик улонэз, ужез яратэмез но лётчик луон мылкыдыз сярысь. Пиналъёсыз ӟеч дышетскыны но тазалыксы вылын ужаны, ас вордскем гуртсэс, калыксэс но дано пиоссэс гажаса но буре вайыса улыны куре.

Али дыре асьме ёросысь егит пиослэн армиын чырткем, кышкасьтэм но етӥз луэмзы сярысь вера военком Васил Валиев. Ѓаны школаын патриотической воспитанилэн шонер нуиськемезлы бадӟым дунъет сётэ. Афган но Чечня ожъёсы пыриськем запасысь солдатъёс тау кылзэс верало, соосты уг вунэто, котьку сӥлы карыса, школае пиналъёсын пумиськонъёсы ӧтё шуыса.

Анай-атаезлы ӟеч кылъёс вераса, йылпумъяське буре ваёнлы сӥзем люкет. Кыкетӥ люкетэз, азьвыл аръёсы сямен ик, герӟаськемын спортъя ӵошатсконэн. Туэ со куасэн бызьылонъя но волейболэн шудонъя ӵошатсконъёс луизы, малы ке шуоно Олег школаын но Арча педучилищеын дышетскон дыръяз пыриськылӥз спортъя пӧртэм ӵошатсконъёсы, тужгес матын кариз куасэз но капчи атлетикаез. Школаын дышетскисьёс но дышетӥсьёс султо куасъёс вылэ, эскеро кужымзэс, кудзы меда кужмогес луоз туннэ, кин Олеглэн нимыныз призэз басьтоз. Волейбол площадкаын ваче пумит «ожмаськон» мынӥз ньыль команда куспын: Ципья, Тюнтер, Малые Лызи но Средний Кушкет. Нырысетӥ интыез басьтӥзы Малые Лызи школаысь спортсменъёс.

Куасэн ӵошатсконын 5-8 классын дышетскисьёс пӧлын кужмоосыз луизы: Елена Арасланова (7 класс), Диана Григорьева (8 класс), Алёна Павлова (6 класс), Дмитрий Шадров (8 класс), Вадим Антонов (8 класс), Иван Кунаев (6 класс). 9-11 классъёс пӧлын вормизы: Алексей Шерстов, Дамир Саттаров, Екатерина Халтурина. Вормисьёс грамотаосын, медальёсын но кубокъёсын пусйиськизы. Праздник йылпумъяськиз Куншетэз лэзёнэн но Россилэн Кункрезеныз.

Мынам тау кареме потэ, ӵош дышетскем эшме буре ваён нуналэз мылысь-кыдысь радъямез понна, туэ гинэ педагог-организатор луыса ужаны кутскем Надежда Александровна Спиридоновалы, спонсоръёслы, лыктэм куноослы.