Горд йырсиё, сӥтьпужыё чебер ныл яке Тагашур гуртысь кутскись удмурт блогерен вераськон

«Ӟечбуресь! Мынам нимы Александра. Но, зэмзэ ке верано, ини 19 ар ӵоже монэ ваньзы «Сашенька» гинэ шуо. Тунсыко, пересьмем бере но Сашенька песянай луомеда?.. Кема дыр ӵоже асме «Шундыысь нылаш» шуисько ини, малы ке шуоно шунды монэ чупаз — со мыным горд йырси кузьмаз, киосам но ымнырам чупам беръёссэ кельтӥз — сӥтьпужыосты. Мынам пушкам но, сюлмам но озьы ик пичи шунды улэ, со ик тӥледлы тылсиоссэ кузьма — со мынам юморе, тӥледыз шумпоттыны быгатэме, мынам ӟеч мылкыды. Тӥ но мынэсьтым тылсиме басьтэ!»

Тагашур гуртысь Александра Раимовалэн «Инстаграм» вотэс бамаз сыӵе чуръёс гожтэмын. Саша — Йошкар-Олаысь медициная колледжын 2-тӥ курсын дышетскись студент. Кылем арын со «Инстаудмурточки» марафонэ» пыриськыса, вормонъёсы вутскиз (таиз сярысь ачиз пыр-почгес мадёз). Аспӧртэмлыко чебереныз висъяськись но удмуртлыкез утись нылашен матысенгес тодматскыны дасесь-а? Кошким!

Кин со сыӵе — Александра Раимова

— Сашенька, асьмеос тонэныд ог-огмес тодӥськомы ини — одӥг школаын дышетскимы ук. Табере лыдӟисьёсмес тонэныд тодматомы. Ачид сярысь, аслад семьяед сярысь ӧжытак мадьы вал.

— Мон вордски 2000-тӥ арын, Тагашур гуртысь нылаш луисько. Анай паласен выжыосы Мари-Турек ёросысь Карлыган гуртысь, атай паласен — асьме ёросысь Тагашур гуртысь. Озьыен, мынам вирсэръёсам Татарстанысь но Марий Элысь удмуртъёслэн вирзы бызе, соин ик мон 100 процентлы удмурт. Пичи дыръям, котькуд гурт нылпи кадь, яратӥсько вал эшъёсыным пӧртэм сямен шудыны. Ньыль классэз дышетски Тагашурысь покчиёзо школаын, 11-тӥ классэз йылпумъяй Ципья шоръёзо школаын. Анае, Лариса Вячеславовна, али дыре ужа колхозын, атае, Валентин Павлович, потэмын ини пенсие. Школаме йылпумъяй «ньыльёслы», дышетскыны пыри Йошкар-Олаысь медициная колледже фельдшерлы. Азьло ик малпай вал Ижкаре удмурт кылъя филологлы дышетскыны пырыны. Но берло малпанме воштӥ: мон кышкай бадӟым городлэсь. Йошкар-Ола но пичи город ӧвӧл, валамон, но отын мынам агае но ӵужапае уло, соос мыным котьку юрттыны дась. Мон дышемын шып, каньыл улонлы. Йошкар-Ола — ӵапак сыӵе город. Отын чус, чалмыт.

— Озьыен, тон тросгес гуртын улыны дышем адями.

— Бен, гуртын улыны дышем адями мон, малы ке шуоно та дырозь улонэ Тагашурын ортчиз. Макем чебер инкуазь отын, вордскем палъёсам, макем йӧноесь адямиос отын, вордскем гуртам. Гуртын ик мынам матысь эшъёсы но. Гуртын мынам сюлэме. Огъя вераса, гуртын улон номаин ӵошатонтэм, номаин воштонтэм.

Сашалы «Инстаграмын» 1200-лэсь тросгес адями гожтӥськемын

— Соин, дыр, «Инстаграм» страницаяд но ӵемысь гурттэ туспуктыса тыриськод, кытын тонэ 1200-лэсь тросгес адями лыдӟе. Озьы ик отын трос гожъяськод, макем тон удмурт кылэз яратӥськод но макем анай кылэныд данъяськиськод. Жаляса верано, туала егит удмуртъёс пӧлын таӵезэ ӵем уд адӟы. Зэмзэ сокем удмурт лулчеберетэз яратӥськод но удмурт луэменыд данъяськиськод-а?

— Зэмзэ но. Мон удмурт луэменым данъяськисько, уг возьдаськиськы ас кылыным вераськыны но. Кызьы анай кылыдлэсь возьдаськыны луэ бен? Макем ведь асьмелэн шулдыресь кырӟанъёс но эктонъёс, кырӟаса но эктыса улоно кадь гинэ. Кыӵе чебересь асьме калыклэн дӥськутъёссы, пужыятэмъёссы. Тросэзлэн удмуртъёслэн вань на ай дэремъёссы, кудъёссэ нуллӥзы соослэн песянайёссы. Кыӵе бадӟым узырлык ведь со, кыӵе бадӟым данъяськон! Кыӵе ческыт пӧрало удмуртъёс, кыӵе чебер произведениос гожъямын удмурт кылын. Ваньзэ вераса быдтонтэм. Асьме калык — туж тыршись калык, соос вань малпам ужпумъёссэс быдэстыны тыршо, ог-огзылы юрттыса, куспазы тупаса улыны тыршо. Соин но, кызьы аслэсьтыд калыктэ но ас вордскем кылдэ уд яраты? Яратӥсько. Удмурт кыл мыным вань кадь кылъёслэсь но матын, удмурт кылын кадь нокыӵе мукет кылын но аслэсьтым малпанъёсме вуттыны уг быгатӥськы.

— Ку но малы Инстаграмад удмурт кылын постъёсты (гожъям материалъёсты) гожъяны кутскид? Секыт-а та ужен вырыны? Та ужедлэсь калык понна (тужгес тынэсьтыд материалъёсты лыдӟись егитъёс понна) кыӵе ке пайдазэ адӟиськод-а? Оло, лыдӟисьёсыныд кусып но возиськод, дыр.

— Нырысьсэ удмурт кылын постъёсме гожъяны кутски 2019-тӥ арын гинэ. Со дырозь вал ини постъёсы удмуртъёс сярысь, но соосты гожъясько вал ӟуч кылын. Туннэ нуналэ та уж кулэ, кинлы ке но удмурт кылын гожъяно шуыса ӧвӧл, гожъясько, малы ке шуоно со мыным туж кельше. Удмурт кылын гожъямъёсме лыдӟо удмурт кылэз тодӥсьтэмъёс но. Соослы тунсыко потэ, мон талы туж шумпотӥсько. Вань сыӵе лыдӟисьёсы но, кудъёсыз постъёсме ӟуч кылэ берыктыны куро, малы ке шуоно соослы тунсыко, мар сярысь мон гожтӥськем. Азьло, зэмзэ но, секытгес вал аслэсьтым малпанъёсме удмурт кылын гожтыны, соосты лыдӟисьёслы вуттыны. Али дыре капчи кадь потэ ни.

Александра Раимоваен интервьюез быдэсэн «Азьлане» газетлэн куинетӥ номерысьтыз лыдӟыны быгатоды.