«Городын улон — мон понна ӧвӧл», — шуэ Владимир Зубарев

Ӧнерезъя инженер луись пиосмурт пичи дырысеныз ик аслэсьтыз улонзэ гурт удысэн герӟаны малпам. Гуртын улон но, пе, шулдыргес, котькин тон шоры тодмоед шоры кадь учке, юлтошъёсыд но татын, ӵыжы-выжыосыд но вӧзад. Таин котькин соглаш луоз.

Гурт удысын кулэ луись вань техникаез Владимир пыр-поч тодэ. Солы ведь машинаосты, сеялкаосты, комбайнъёсты, культиваторъёсты контроль улсын возёно, соослэсь ремонтсэс радъяно. Секыт механизмъёсты ремонт карыку, аслыз но юрттоно, запчастьёслы заказ сётоно но трос мукет ужъёсты быдэсъяно.

Владимирлэн пичи дырыз Владимирской но Кировской улосъёсын ортчем, собере ини солэн семьяез Татарстанысь Балтась ёросысь Дурга гуртэ улыны выжем. Туннэ нуналэ но со гуртын уло. Казаньысь Аграрной Университетэз йылпумъям выпускник городэ кыльыны воксё малпамтэ — дышетсконзэ йылпумъямез бере аслаз гуртаз, Дургае, ужаны бертэм.

— Анай-атае гуртын, соослы юрттыны кулэ, ма, городын улон но — мон понна ӧвӧл, уг кельшы мыным отын, — шуэ Владимир. — Соин, дышетсконме йылпумъяме бере ик, гуртам бертӥ.

2008-тӥ арын Владимир ужаны кутскем «Активист» обществоын гурт удысысь машинаосъя инженер луыса. Со арын ик, декабрь толэзе, армие служить карыны, Нижегородской улосэ кошке. Бертыса гинэ вуэ но, нош та обществоын ик ужзэ азинтэ. 2011-тӥ арысен кутскыса ужез утёнъя специалист, газ хозяйство понна кылкутӥсь но луэ Владимир. Витетӥ сезонзэ со ини «MacDon» косилкаен ужа. Уждунъёс городын кадь уг тырисько ке но, Владимир аслэсьтыз ужзэ яратыса быдэстэ. 2016-тӥ арын со Агропромышленной комплексысь егит специалистъёс пӧлын ӧнер устолыкъя ортчем конкурсэ пыриськыса, Балтась районмылэсь данзэ утьыса, 1-тӥ инты басьтӥз.

— Туэ тани сӥзьыл яке толалтэ Германие стажировкае но лэзёзы, та конкурсын вормем понна, — шумпотэмзэ ватытэк вера инженер.

Тани асьмеос пӧлын кыӵе усточиос но вань вылэм! Шумпотымон, туала дыре таӵе конкурсъёс ортчытыса гинэ уло. Гуртысь адямилы ассэ возьматон понна та кыӵе бадӟым луонлык.

Тани нош мае вераны кулэ: Владимир ужаз гинэ оскымон адями ӧвӧл, семьяяз но со юрттӥсь пи, кузпал но атай. Кышноеныз Снежанаен соос туннэ нуналэ кык нылпи будэто — Викторияез но Артёмез. Владимир сельхозтехникаен гинэ уг выры, пудо но уте, али лэсьтӥськон ужъёсыз но мыно дораз.

Таӵе адями бордысь ик кылдэ ужась, сётэм кылзэ быдэсъясь пиосмуртлэн тусбуез. Аслаз ужезлэн патриотэз луэ Владимир. Туннэ нуналэ тросэз гурт удысын ужасьёс бадӟым миссиез быдэсто чаклало — гуртысь улонлэсь ӟечлыксэ ӝуто.