Хезмәт

Балтач районы

18+
2024 - Гаилә елы
Азьлане

Гож-пусъёс понна ужамы

Наталья Жукова шонер гожтэ секыт улонэз адӟем мӧйыос асьсэ сярысь трос уг верало шуыса. Курадӟыса но секыт улэмзэс ӝоггес вунэтыны тыршиллям, шӧдске. Мар но со сярысь юалляськыны кутскид ке: «Мон номыр уг тодӥськы ни. Мон вунэтӥ ни», — шуо.

Зинаида Перемечевалэн (со мынам кумапае) тазалыкез лябӟемен сэрен ӵемгес со дорын пукыны тупа. Нуналысь-нуналэ вераськонъям пичиен-пичиен верам тодэ ваёнъёсыныз тодматски. Тани солэн верамез.

«Вордски 1939-тӥ арын, пинал но егит дыры туж секыт дауре тупаз. Уж секыт, кӧттыр сиён ӧй вал, дӥськут но начар. Атай кулыку, мыным 14 арес гинэ вал. Агай армие кошкиз сизьым арлы, но куать ар служить карем бераз секыт висьыса бертӥз. Ӵош служить карем Бугульмаысь бигер пи келяса вайиз. Агай бертыку, ӝӧк вылэ шорманы няньмы но ӧй вал, анаен бӧрдӥськомы. Ӵуказеяз, келяса вайись бигер пи Ципьяе мыныса одӥг сукыри нянь вайыса лыктӥз но берен армие кошкиз. Больницае нуыса но ӧз бурмы ни, ӝоген агае кулӥз. Укмыс нылпиос пӧлысь ми куинь нылъёс улэп кылимы. Улон-вылон, нылпи будэтон анайлы туж секытэн сётӥськиз, соин но, дыр, мыным шуиз: «Эн кошкы картлы, мар сиемед потӥз сиы, огнад гинэ улы, Инмарлы вӧсяськыса». Со верамъя ик луиз. Кык апайёсылэн нылпиосыз аслам кадь пото, соос но монэ ӵужапай гинэ шуо, быгатэмзыя юртто.   

Пичи дыръям кутэн но ветлыны тупаз. Школае дэра сумкаен ветлӥ, берло книгаосме кышетэн думыса ветлӥ. Сизьым классэз быдтэм бере дышетсконме азьланьтыны луонлык ӧй вал ни. Колхозын ужаны кутски. Лэзизы Марийское нюлэс погыръяны, поттылыны. Коръёсты, кузь уробое тырыса, валэн поттылӥмы. Воргоронъёс дышетӥзы, кызьы ужаны: «Писпу усьыку, сак луэ, учкелэ куд пала усёз писпу, улаз эн шеде». Озьы но огполаз писпу улэ шеди, ярам ай лымы трос вал. «Улэп-а, улэп-а?» — шуэмзэс гинэ кылӥ поттыкузы. «Асьтэдыз умой возиды ке, урод кылъёсын ӧд ке вераське, тӥледыз нокин но кур уз кары», — шуыса вераллязы воргоронъёс.  Ми, егитэсь нылъёс но пиос, огазьын улӥмы одӥг песянай дорын квартираын, изимы радэн-радэн огазьын ик, корка пасьтана сэндраын. Огполаз доре бертыкум анай сап-сап висьыса кылле вал, солы верай: «Тонэ огнад уг кельты ни, нюлэскы ужаны уг мыны, фермаын инты луиз ке, скал кыскись луо». Татын но капчи ӧй вал, али но паймисько чидаммылы секыт ужлы. Ваньзэ киын ужамы: скал кыскимы, куро пыртылӥм, силос нуллӥм ведра-карнанэн, кезьыт вуэн гольык киосын картофкаез миськыса, пуртэн юдыса скалъёсты сюдӥмы, пӧзьтэм картофкаен но пызен сурет лэсьтыса, шуныт вуэн скалъёсты люктамы, ведраосын нуллыса, кыедзэ сузяса тачкаен поттылӥм. Кыскем йӧлмес бидонъёсын васькытъяса, шурысь вуэ сӥятыны тырылӥмы, берло, ферма дорысь ошмесэз бугроен котыртыса, йӧл сӥятон инты лэсьтӥзы. Йӧлмес валэн нуллоно вал йӧл люкан интые Ципьяе, аппаратэз киын бергатыса, йӧлэз сепарат пыр лэзимы. Черодэн ветлӥмы йӧл нуллӥсьлы юрттӥськыса, йӧлэн бидонъёсты валлэн уробояз асьмеос ик ӝутъяса тырылӥм-васькытъям. Анна апай (Никитина Валялэн анаез), валэн йӧл нуллӥсьмы, кызьы чидаз, дыр, шуыса паймисько. Секыт бидонъёсты огназ лобак гинэ ӝутъяса уробое тырылӥз но, васькытъяз но. «Та ужам ужез кабанъёсын лыдъяд ке, кӧня луысал меда мынамъёсыз!» — шуылӥз. Ваньзылэсь трос Анна апайлэн кабанъёсыз луысалзы, секыт ужлэсь ноку ӧз кышка.

Трудодень понна, гож-пусъёс понна секыт ужъёсты ужамы. Кызьы чидаммылы али но паймисько. Улыса-вылыса председатель Эшкеев Алексей шуиз: «Табере литр йӧллы быдэ 5 копейкаен уждун тыриськоз». «Ӧжыт ук со», — шуыса ымме вуттӥ. «Вунэтӥд но-а, мар-а гож-пусъёс понна ужамдэ», — шуыса чурыт вераз. Тани вуиз кема аръёс ӵоже витем уждунмес басьтонмы. Фермаын ужась эшъёсынымы, сизьым кузя люкаськыса, горд вина басьтӥмы но, бускельысь Артя, Данька, Катёк, Паши, Печок песяйёсты но анаез ӧтьыса, сяськаяськись улмопу бакчаямы пукыса, соосты куноямы.

Гужем скалъёсты Янгурчиын но кардаын возизы, отын соосты возьманы возьёс эркынгес вал. Скалъёсты кыскыны отчы Вукогуртысен валэн ветлӥмы. Мон ужаку, электричество гинэ но ӧй вал, аппаратэн кысконэз тодӥсь но ӧй вал. Уин кунян вордӥське ке, ёрмоно вал: оло фонарез киын возёно, оло кунянэз ӝутыса пыртоно. Электротыл пыртэмзы бере, туж каньыл луиз.

Скалъёс макнязэс сиён куспетӥ ферма коркан чильтэр чильпаса пукыны но вуимы. Аслым вури чильтэро пушдэрем, сокем чебер пӧрмиз. Дэрем сӧзулме пичияк ӝутыса, синмаськыса учкылӥсько вал. Милям ёзъёсмы туж устоесь вал чильпаськыны, чильтэр басьтыны уксёмы ӧй вал. Дӥсьмес но изён котырмес чеберъямы ас киын чильпаса. Арлы быдэ Акашкалы ферма коркамес миськимы, гид котыръёсты утялтӥмы. Соку фермаын ваньмы егит нылъёс но ужамы: Татьяна Филиппова, Зоя Сидорова, Лидия Лобанова (Кузнецова), Мария Кузнецова, собере мукетъёсыз нылъёс итӥськизы. Туж зол тыршыса, асьмемыз жалятэк ужам данмы Москва дорозь вуиз, Филиппова Матрёнаез (Наздекова Галялэн анаез) Москвае ВДНХ-е лэзимы. Берло милемын кивалтӥз сабырлы, адямиез гажась, котьку юрттыны дась Егор Щербаков. Гурт калык но котьку солы вазиськылӥз, пудозы висьыку, кунянзы секытэн вордӥськыку, гуртын электротыл кысӥз ке, мукет учыръёсы но. Тазалык сӥзисько солы.

 Василий Кузнецов кочегар луыса ужаз. (Пумаз гожто на Вася агаен вераськеммес — В.Л.). Ӵукна ваньмылэсь азьвыл фермае вуылӥз, дояркаос лыктыку, пӧсь ву дась луэ вал ини. Туж юрттӥз милемлы, ноку «уг» ӧз шуылы. Куддыр гинэ тышкаське вал, пӧсь вуэз арам-сурам кариськоды шуыса. Тани сое алигес гинэ берпум сюресаз келямы, Инмар ӟеч интые мед интыялоз ни, туж умой адями вал. Улэп эшъёсы понна но, кулэмъёсыз понна но вӧсяськыса улӥсько.

Озьы кема аръёс ӵоже скал кыски. Фермаын нош сӧсырмыны шедьылӥ, тазалыке лябӟем бере гинэ инвалид луыса ужысь потӥ. Сокем курадӟыса, секыт улонэз адӟыса но та дырозь улӥсько ай, Инмарлы тау. Али туж умой улӥськомы ук асьмеос, ӝӧквыл тыр сиён-юон, дӥськутлы но ум ёрмиське, корка но шуныт. Одӥг шырпуэн чай пӧзьтӥськом, самоварен выронэз ӧвӧл ни. Шырпулы но ёрмыса улонъёс вал, кинлэн ке муръётӥз ӵын потӥз ке, соос доры ӝуась эгырзэс курыны мынӥмы, гурмес аратон понна. Нюлэскысь пу вайыса дасянэз но ӧвӧл ни, азьвыл, пу утчаса, Марийское но, Кировское но пыдын ветлӥськом вал.  Туала калык дунъяны мед быгатысал вал таӵе умой улонэз».

Вера Лобанова, Вукогурт.

Следите за самым важным и интересным в Telegram-каналеТатмедиа

 

Без социаль челтәрләрдә:  ВКонтакте, ВКонтакте, ТикТок, Ютуб, Одноклассники, Телеграм, Яндекс.Дзен

 

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.


Оставляйте реакции

0

0

0

0

0

К сожалению, реакцию можно поставить не более одного раза :(
Мы работаем над улучшением нашего сервиса

Нет комментариев