Хезмәт

Грант утэм вал ини, нош ик одӥг вормон

Пускань гуртысь трос тодмо адямиос потӥзы. Та сям татын али но азинтӥське. Егит кивалтӥсьёс, специалистъёс будыса тодмо луо. Татарстан Республикаысь Гурт хозяйствоя но сиён-юонъя министерство, егитъёсты гуртэ кельтон ужпумен, кемалась ӧвӧл хозяйствоосын ужась 18-35 аресъем специалистъёс пӧлын конкурс ялэм вал. Вормисьёс пӧлын Пускань гуртын будэм, татын улӥсь Азат Ганиев но...

- Заинскысен лыктэм коллегалэсь одӥг-кык очколы гинэ кыли. Тодон-валанъёсты теоретической ласянь но, практической ласянь но пыр-поч эскеризы, - шуэ Азат. Музъем ужанын агротехнической ужрадъёс, севооборот, кизьыны кидыс дасян (сортъёсыз, репродукциез...), огъя вераса, юанъёс трос пӧртэм луиллям. Тимирязев нимо хозяйствоын 2003-тӥ арысен ужаны кутскем опытэзлэн, гурт хозяйствоя академиын дышетскыса басьтэм тодон-валанэзлэн но юрттэтэз бадӟым луэм Азатлы.
Хозяйстволэн со дырысь валтӥсь агрономезлэн Гаптрауф Саляховлэн кивалтэмез улсын кидысъёсъя агроном луыса ужаны кутске со. «Агроном понна кулэ луэм туж тросэзлы дышетӥз, музъем ужась механизаторъёсын ужаны, соосын музъем ужанэз радъяны но солэсь дышетски», шуыса Азат наставникезлы бадӟым тау каремзэ вераз. 2007-тӥ арысен, Гаптрауф дано шутэтсконэ потэмез бере, Азат солэн интыяз Тимирязев нимо хозяйствоын валтӥсь агроном луыса кыле. Вылӥ тодон-валан басьтыку нырысетӥ куинь арзэ нуназе отделениын дышетскемлэн но пайдаез бадӟым луиз шуэ. Теория ласянь самой кулэ тодон-валанъёсты басьтыны быгатэм. Собере со куинь аре дышетскемъёсты практикаен герӟан азьпалан дышетсконын бадӟым юрттэт луэм.
Тимирязев нимо хозяйство районын кидысъёсын ужась куинь хозяйстволэн одӥгез. Арлы быдэ вылӥ кондициен, ӟеч сорто 100 тоннаосын кидыс вузаса шӧдскымон бадӟым суммаен уксё ужало. Туэ урожайлэсь но вузаны 700 тонна кидыс дасяллям. Тодмо ини, самой-самой шуэмзэ асьсэлы кельтӥллям. Ялан утчаськыса, нош но удалтэм урожай сётӥсь выль сортъёсын ужало. Чабейлэсь «Симбирцит», «Экода-70», йыдылэсь «Нур», «Раушан», сезьылэсь «Конкур», кӧжылэсь «Ватан» выллем асьме условиослы чидась сортъёссэс будэто, вузало. Туэ «Сингента» фирмаен ӵош картофкалэсь «Венета», «Маделина» сортъёссэ шапыкен ву кисьтан амалэн будэтӥзы. Урожаез витемлэсь но умой луэм, вузаса прибыль басьтӥллям. Соин ик вуоно аре та сортъёсты нош но бадӟымгес площадьын будэтыны малпало. Азат Ганиев республикаын ортчытӥськись пӧртэм конкурсъёсы активно пыриське но аслаз тыршеменыз, дӥсьтӥсь, сётскисьтэм луэменыз вормонъёсы вутске. 100 сюрс манет грант басьтыны но вутскем. Егит семья понна туж ярам та. Карелино нылпи садын заведующий луыса ужась кузпалзэ Айгулез, Камила но Малика нылъёссэ ялан шумпоттыса улыны тырше Азат. Озьы гинэ но ӧвӧл, гуртоосыз, тужгес но егитъёс пӧлын но авторитетэз бадӟым солэн. Ваньмон дыръёсаз хоккеен шудэ. Хозяйстволэн сборной командаезлэн составаз усто шудӥсьёслэн одӥгез но гуртысь пиослэн наставниксы. Соос асьме дорын гинэ ӧвӧл, бускель районъёсын, Казаньын ортчытӥськись ӵошатсконъёсы но ялан пырисько. Хоккеен шудыса, озьы ӧжытак ужъёсты «вунэтыса» басьтонлэн ужлы но пайдаез бадӟым, шуэ Азат. Малпаськыны быгатон будэ, мынэм интыосын выль эшъёс шедьтӥськод. Соос пӧлын ачид кадь музъем ужасьёс но пумиськыло, вераськон кылъёс уг быдмо. Кытчы мынӥз ке но, аслэсьтыз валтӥсь ужзэ вунэтытэк, хозяйствоын музъем ужанэз азьпала нуымон кыӵе ке но выльзэ, опыт басьтыса бертыны тырше. Кидысъёсъя агроном Айнур Сафин но солы ужаз оскымон пыкет, кенешчи, юрттӥсь. Районысь егит агрономъёслэн одӥгеныз «Кама» хозяйствоысь Айдар Асхадуллинэн но «кӧжызы пӧзе» соослэн. Пӧртэм конкурсъёсы но трос дыръя ӵош пырисько, вормо, грантъёс уто. Та вормонэз басьтыса бертэм берло конкурсэ но кыкназы ӵош мынӥллям. Бадӟым вормонэныз нырысетӥ луыса коллегазэ Айдар ӟечкылам. Тани ми но сое сюлмысен ӟечкыласькомы. Та вормон сое выльёсызлы, нош но бадӟымгес азинсконъёсы вутскыны мед бурдъялоз.

Реклама

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.

Иң мөһим һәм кызыклы язмаларны Татмедиа Telegram-каналында укыгыз


Теги: 250
Нравится
Поделиться:
Реклама
Комментарии (0)
Осталось символов: