Хезмәт

Гумыр — бызись ву

«Ӧй но малпа, та дырозь уло шуыса. Малпасько 80 аресам вуыны юрттӥзы, дыр, нылпиосы, соослэн пиналъёссы, ӵыжы-выжыосы, матысь эшъёсы но бакчаысь мушъёсы. Малы ке шуоно толалтэез висьыса ортчытӥсько, нош гужем мушъёсын вырыса нуналлэсь кызьы ортчемзэ но уг шӧдӥськы, висёнъёс но вуно» - шуыса, вера атаймы Мамыков Аркадий Петрович.

Атаймы вордскиз1935-тӥ арын 18-тӥ мартэ Ӟаны гуртын. Анаезлэн куинетӥ нылпиез луэ со. Атаез - Мамыков Пётр Матвеевич - луэ колхозлэн председателез. Жугиськон кутскем бере, со ас мылкыд каремезъя оже кошке но ивортэк ыше. Берпуметӥ гожтэтэз 1942-тӥ арын Сталинградысен вуэ. Анайзы куинь нылпиен огназ кыле. Туж секыт аръёс кутско. Нош улыны кулэ вал. Атаймылы соку 6 арес луэ. Бадӟымез но пичиез бусые кылем сисьмем картофкаез бичаса , куасьтыса, пызь карыса нянь пыжо, шыд пӧзьто. Соку атаймылы анаеныз ӵош ньыль ар ӵоже гурт калыклэсь ӟазег кутьызэ но возьманы тупам.
1944-тӥ арын атаймы нырысетӥ классэ дышетскыны пыре. Дышетскыны туж секыт луэм, пыдкутчан но, дӥськут но луымтэ. Озьы но со туж тыршыса дышетскем. «2» отметка басьтыса дышетскисьлы школаын сиён уг сёто, пе, вал. Шуг-секытэн, курадӟыса улэменызы, атаймылы 7 классэз гинэ йылпумъяны тупам. Собере визьмо, тыршись 16 аресъем пиез колхозэ табельщик карыса басьтӥллям. 1953-тӥ арын атаймес армие басьто, отысь бертэмез бере, колхоз бухгалтерлы дышетскыны лэзё. Училищеез йылпумъяса, вордскем гуртысьтыз колхозын бухгалтер луыса ужаны кутске.
1959-тӥ арын атаймы гуртысь одӥгзэ чебер, тыршись нылашез - Елизаветаез пумитаса семья кылдытэ. Соос ӵошен куинь нылпи вордо: кык пи но одӥг ныл. Бадӟым пиез Василий Казаньысь торговой институтэз йылпумъяса, семья кылдытыса, Ульяновск городын улэ. Нылыз Елена вылӥ тодон-валанэн дышетӥсь. Али дыре Барнаулын аслаз семьяеныз улэ. Нош покчи пиез Олег вордскем гуртаз тракторен ужа.
Секыт жугиськон но собере аръёс атаймылы вунонтэм яраос кельтӥзы ке но, тазалыксэ лябӟытӥзы ке но, колхозын ужан вакытаз со ноку ӝожтӥськылымтэ, аслэсьтыз ужзэ яратыса но пумозяз вуттыса быдэсъям. Отчётлы дасяськон вакытаз уйшорозь документъёс пӧлын бугыръяськылэм, нош вазь ӵукна ик султыса, гынсапег погыллян ужен вырем. Со ик дыре нунал потэм Тюнтере уж дураз ветлэм.
Ялан улыны, семьязэ утьыны тыршись атаймы 1965-тӥ арысен муш вордонэн тунсыкъяськыны кутскем. Та ужзэ со кык уморто муш басьтон бордысен мытэм. Нош туннэ со ӝыны дауръем опытэз луэм зэмос мушкась ини. Муш вордонлэсь капчи уж луымтэзэ мон соослэн семьяязы кен луыса лыктэм бере гинэ валай. Мушкасьлэн ужез вазь тулысысен бер сӥзьылозь кыстӥське. Атаймы та дыре вазь ӵукна ик мушъёсыз доры потэ. Соосты утьыкуз кырӟан гуръёссэ мытэ. Кӧтыз ӝож луыку но, шумпотыкуз но кырӟан солэн матысь эшез луэ. Паймисько мон атаймылэн жадьытэк, раньӟытэк та ужен выремезлы, мушъёссэ пичи нунокез выллем утемезлы. Нош ик паймисько йырвизё луэмезлы. Со али куке но школаын дышетскем кылбуръёссэ внукъёсызлы могатэк вераны быгатэ. Магазинэ мынӥз ке, басьтэм арбериосызлэсь дунзэс вузкарись калькуляторен чотатозь ик вераса сётоз.
Та арлыдэ вуыса аслаз тазалыкез пумысен ялан сюлмаськемез но паймытэ. Со ӵукна вырӟыса зарядка, массаж лэсьтэ, мугорзэ кезьыт вуэн коттэм ӵушконэн ӵушылэ.
Та югыт дунне вылын таӵе капчи мылкыдо, каньыл сюлэмо, кунояны, мукетъёсты шулдыртыны быгатӥсь 80 арессэс тырмытэм воргоронъёс чиньыосын гинэ лыдъямон, дыр.
Гажано атаймы, бабаймы но ӵужатаймы! Тонэ вань сюлмысен ӟечкыласьком вордскем нуналэныд - бадӟым юбилееныд. Сӥзиськом юн тазалык, шудбур, ӟеч мылкыд. Ымнырад котьку мед луоз пальпотон, вӧзад мед луозы улонысь эшед, нылпиосыд, соослэн пиналъёссы, оскымон эшъёсыд.
Милям бакчамы али туж шулдыр,
Гужлась мушъёсмы вань дыръя.
Милям коркамы али туж шулдыр,
Атай куарамы вань дыръя.
Кузпалэдлэн, пиналъёсыдлэн, внукъёсыдлэн, ӵыжы-выжыосыдлэн нимынызы кенэд Лариса.

Реклама

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.

Иң мөһим һәм кызыклы язмаларны Татмедиа Telegram-каналында укыгыз


Теги: 250
Нравится
Поделиться:
Реклама
Комментарии (0)
Осталось символов: