ГУРЛА «ШУЛДЫР ӜЫТ» (фото)

Пыриськизы Карек-Серма , Сизнер но Турья гурёсысь самодеятельёс. Сьӧразы вайиллям чебересь жингрес кырӟанъёс, капчиесь задор эктонъёс, пуштросъемо кылбуръёс, огзылэсь огзы усто вурем костюмъёссэс. Карек-Серма клублэн кивалтӥсез Зоя Никитина ачиз вурем ни ог дасо концерт дӥськут, материал басьтыны коньдонэн ООО «Бурнак» -лэн тӧроез Р.Н.Назипов юрттэм, ватсам на кылем арын «Лулгур» фестивале мыло-кыдо пыриськемез понна сертификат коньдонзэ но. Концертлэн бадӟым люкетэз карек-сермаысьёслэн вал, малы ке шуоно соос кузё. Озьы вал кылем арын Сизнерын но. Кылдэм ке, вуоно аре Турья пумиталоз ни.

Концертэз капчи мылкыдын, чебересь кылъёсын нуизы Н.Шестакова но И.Игнатьев. Учкисьёс но жюри Игорьлэсь кырӟаны но эктыны быгатонлыксэ но шараязы на. Котькудӥз быдэстэм концерт номер ас сяменыз дуно вал. Пусйыны кулэ Сизнер клубысь (кивалтӥсь Т.Маркова) - Наташа Баймановалэсь гуртэз сярысь, нылъёслэсь «Ой,яра» но «Льӧль сяська» кырӟанъёсты, удмурт эктонзэс но инструментэн шудӥсь Марковъёслэсь семейной ансамбльзэс, Турья клубысь (кивалтӥсь И.Исьмекова) - «Палэзьпу», «Чупалляй» , «Тодыса-а, тодытэк-а» кырӟанъёсты, кылбур лыдӟисез А.Тимофееваез, Карек-Серма клубысь( кивалтӥсь З.Никитина) - Я.Игнатьевез, Д.Васильеваез, И.Игнатьевез,арганэн шудыса кырӟась А.Петровез, А.Никитинэз, М. Никитинэз, Н.Игнатьеваез, А.Петроваез, пинал арганчиез но эктӥсез А.Ивановез, сцена вылысь люконтэм ветеранъёсты Н. Константиноваез, М.Якимоваез но З.Никитинаез, концертэз нуыны юрттӥсез Саша Ивановез. Таос пӧлысь ваньзы,»Айкай»-ысь артистъёс сямен, кырӟаны но, эктыны но туж шаплыесь. Концерт йылпумъяськиз бигер кылысь удмурт кылэ берыктэм «Аерылмагыз» - «Эн люкиське» кырӟанэн.

Клубе пачыл калык люкаськиз, котькуд номерез ӟырдыт кичабонъёсын дунъяллязы. Кужмо дасяськиллям котькуд гуртысь артистъёс. Созэ но вераны кулэ, одӥгез гурт но туж бадӟым ӧвӧл, школазы гинэ но ворсамын ни, калыкез концертэ кыскыны туж секыт, котькудзылэн доразы ужзы, векчи нылпиос. Куд-ог гуртъёсын кадь шоръёзо школаын дасям номеръёсын сцена вылэ потыны луонлыкмы ӧвӧл, ваньзэ клубен кивалтӥсьёслы дасяны тупа. Тау артистъёслы учкисьёслэн нимынызы но, учкисьёслы - артистъёслэн нимынызы.

Ӟеч мылкыдын В.П.Никитин,

Карек-Серма гурт.