Гурт праздникмы шулдыр ортчиз (+фото)

Со озьы Семык праздниклы куноос доразы, ӵыжы-выжыоссы доры бертылӥзы. Кудӥзлэн ке вордскем юрт интыяз вож турын ӝужаз ни, соос вордскем интыязы дугдылыса, тодазы вайылӥзы, дыр, шулдыр ортчем пинал но егит дыръёссэс, анай-атайзэс, песяй-бабайзэс. Дуно вордскем гурт! Но пӧртэм мугъёсын вашкала юртсэс куштыса кошкыны тупаз…

Вуиз ӝыт. Туннэ Гуртлэн нуналыз. Клуб капка но азбар пуш чебермамын пӧртэм шаръёсын. Пуктылэмын кузь ӟусъёс, дасямын сцена, радиоаппаратура, пеймытлы югыт тыл. Тани татын ӝӧкъёс, соос пӧртэм сиёнъёсын шобыртэмын, палэнынгес кык самоварен чайлы ву быректэ, кырӟаса куноослэсь лыктэмзэс иворто. Табань пыжем вӧй зын, тӧлъя вӧлмыса, дораз кыске, бадӟым пуртыын сӥлен-вӧен вазь ӝук пӧзе, дасяло быгыто гинэ шашлык. Быдэс гуртамы, мылкыдэз ӝутыса, вӧлмо шулдыресь эктон но кырӟан гуръёс…

Калык 18 час бере ик люкаськыны кутскиз. Куноосты пумитало Людмила Иванова но Людмила Андреева, Алёша Ивановлэн мыло-кыдо мызган шудэмъяз векчи виятэменыз но чечыен-нянен.

Праздникмы чаклам дыре ик кутскиз, малы ке шуоно ваньмыз дасямын ни вал. Куноос тырмыт люкаськизы - районысьтымы Лӧзяласен Кускемозь лыктӥзы. Казаньысь, Удмуртиысь, Свердловск палъёсысь… Празднике лыктэмъёсты шунытэсь кылъёсын ӟечкылазы ООО «Бурнакысь» директорлэсь ужзэ быдэсъясь В.В. Хакимуллин, Бурнак гурт поселенилэн йырыз Ш.Н. Хабибуллин.
Праздникез нуисьёс Наталья Шестакова но Игорь Игнатьев крезьгур улсын тодмато гуртмылэн историеныз, отысь дано пудо вордонын но бусы ужъёсын тыршисьёсын. Сцена доры ӧтё Аграфена Игнатьеваез - гуртысьтымы тужгес мӧйыез улӥсьмы, солы 89-тӥ аресаз кошкиз ни. Аграфена апай вань люкаськемъёслы тазалык, шудбур сӥзиз, тау кариз пересьёсты гажамзы понна. Нош самой покчиез Якимова Вероника, солы 8 толэзь гинэ ай. Озьы ик Вероникалэсь кыкполэс песяй-бабайзылэсь Якимова Таисия но Александрлэсь самой кема 56 ар ӵоже ӵошен улэмзэс пусйизы. Котькудӥзлы пусъем муртлы салам карыса кырӟан но эктон быдэстӥськылӥз. Концерт номеръёсын ӵош шулдыресь шудонъёс радъяськылӥзы (шудытӥсьёс Артём Якимов, Лариса Никитина, Людмила Петрова, Нина Константинова, Мария Якимова), дэмен калык эктонъёс. Асьсэлэн жингрес азвесь куараенызы паймытӥзы Ципьяысь лыктэм куноосмы - Арча педколледжысь студентка Денисова Анюта но Ципья школаын дышетскись Шестакова Арина.

Тужгес тунсыкоез «Атас кутон» вал. Атас чырткем Валерий Константинов киез шедиз. Праздник, куазь салкым шоры учкытэк, бер уйшорозь кыстӥськиз. Гурт калыклэн нимыныз тау кылъёс вераме потэ ваньзылы, кинъёс праздникез радъянэ пыриськизы, косэм муртъёс нокин но пумит ӧз кариське. Со возьматэ ни гурт калыклэсь каньыллыксэ, тупаса улэмзэ. Азьланяз но озьы мед луоз! Фермаын жадьыса ужаса бертэм беразы Камаева Нина но Копарова Надежда табань пыжизы, Дмитриева Ираида куноосты пӧртэм турынлэсь витамино ческыт удмурт чаен секталляз, кемалы ческыт шӧмыз ыме кыльымон вазьлэсь сӥльын ӝук пӧзьтӥзы Петрова Алевтинаен Рогожина Елена, соослы эстӥськон паласен Петров Геннадий юрттӥз. Чай дасяны оскемын вал пенсионеръёслы Зоя апай Ивановалы но Анисья апай Никитиналы - 10 самовар чай, пе, пӧзьтӥмы. Вордскем гуртысьтызы вуэн чай ку нош юысалзы! Мыжык быдӟаесь быгыто шашлык дасязы Игнатьевъёслэн семьязы. Тау кылъёс вераны кулэ культура удысын ужасьёслы, соослэн семьяоссылы, районысьтымы нимысьтыз радиоаппаратурая операторлы Марат Гибадуллинлы, шофёрлы Марсельлы. Тау спонсоръёслы - ООО «Бурнак» но ужбергатӥсьлы Владислав Прокопьевлы но гуртысь калыклы коньдонэн юрттэмзы понна.

P.S. Праздникамы лыктэм куноослы туж кельшем, телефонам жингыръяло, тау кылъёс верало. Вуоно арын но ортчытыны куро. Инмар юрттэмен, кылдэм ке, тыршом ортчытыны. Праздник - со сиён-юон, шулдыръяськон гинэ ӧвӧл на, со кемалась адӟиськымтэ гуртоосыныд матын луыса пумиськон, вераськон, тодэ ваёнъёс. Кемалы кылёз тодамы та ужрад. Вуоно аре выльысь витёмы, гуртоосмы! Тазалык ваньдылы! Вуонояз ӵошен кырӟан вылысь, дэмласько та кырӟан-кылбурез дышетскыны, крезьгурзэ мынам контакт бамысь шедьтыны быгатоды.

1. Вордӥськем палъёс, мусо интыос,

2. Пичи гурт-а со, бадӟым гурт-а со,
Кинлэн ке но вордскем интыез.
Баблес кызьпуос, тӧдьы льӧмпуос
Возьмало азьвыл тодмооссэс.

3. Кыдёкын-а тон, туж матын-а тон
Та мусо вордскем интыедлэсь,
Сюлэм вӧсь луоз, синкыли потоз,
Анай-атаед тодад лыктоз.

4. Син азяд пуксёз туж пичи дырыд,
Анай-атайлэн мусоямзы.
Матысь эшъёсы, нырысь яратон,
Ваньмыз но со вордӥськем палъёс.

5. Нош аръёс ортчо ворттӥсь вал сямен,
Соосты уг луы кутыны.
Вордӥськем юртэд, вордӥськем гуртэд
Котькытчы мын - улозы сюлмын.
(Кылъёсыз Н. Бочкарёвалэн)

Василий Никитин,
Карек-Серма гурт